მსჯავრდებულ დეკანოზ გიორგი მამალაძის ადვოკატებს უზენაესი სასმართლოს განჩინება ჩაბარდათ.
როგორც „ჯი-ეიჩ-ენთან“ დეკანოზის ადვოკატი, გიორგი ფანცულაია აცხადებს, 30 ფურცლიან განჩინებაში პირველი და მეორე ინსტანციის გადაწყვეტილებაა გადაწერილი.
„ნიშანდობლივი და საინტერესოა, რომ უკანონო განჩინებას სამივე მოსამართლე ეთანხმება, მათ შორის, უკვე გადამდგარი ნინო გვენეტაძეც აწერს ამაზე ხელს.
განჩინება ერთი შეხედვით, საკმაოდ მოცულობითია, 30 ფურცლიანია, რომელიც დასაბუთებას უნდა შეიცავდეს, მაგრამ ამ 30 ფურცლიდან 25 პირდაპირ, სიტყვა-სიტყვითაა პირველი და მეორე ინსტანციის სასამართლოს განაჩენიდან გადატანილი.
ბოლო ფურცლებზე რამდენიმე მოკლე პოზიცია აქვთ დაფიქსირებული, ალბათ, რთული იყო მათთვის იმის განმარტება, თუ რატომ არ მიიღეს აღნიშნული საქმე წარმოებაში. ამიტომაც წერენ, რომ თურმე, უზენაესი სასამართლო ვალდებული არ არის, ყველა კითხვაზე პასუხი გაგვცეს, მათ შორის იმაზე, თუ რატომ არ მიიღეს დეკანოზის საქმე წაროებაში. მათი განმარტებით, უფლება აქვთ, პირველი და მეორე ინსტანციის გადაწყვეტილებას დაეთანხმონ.
ამ ყველაფრიდან გამომდინარე, ჩვენ რაც შეიძლება მალე მივმართავთ სტრასბურგის ადამიანის უფლებათა სასამართლოს“, - აცხადებს ფანცულაია.
შეგახსენებთ, რომ 2017 წლის 5 სექტემბერს, მოსამართლე ბესიკ ბუგიანაშვილმა დეკანოზ გიორგი მამალაძეს 9 წლით თავისუფლების აღკვეთა მიუსაჯა. განაჩენი ორივე მხარემ გაასაჩივრა. პროკურატურა განაჩენის დამძიმებას, დაცვა კი გამამართლებელ განაჩენს ითხოვდა.
სააპელაციო სასამართლომ არცერთი მხარის მოთხოვნა არ დააკმაყოფილა და ძალაში საქალაქო სასამართლოს გადაწყვეტილება დატოვა.
რამდენიმე დღის წინ კი, აღნიშნული სისხლის სამართლის საქმე უზენაესმა სასამართლომ წარმოებაში არ მიიღო.
