ხორავას ქუჩაზე მომხდარი მკვლელობის საქმეზე პარლამენტში შექმნილი დროებითი საგამოძიებო კომისიის წევრები გლდანის მე-8 დაწესებულებაში დანაშაულის დაფარვის ბრალდებით დაკავებულებს გამოკითხავენ.
როგორც კომისიის თავმდჯომარე, სერგი კაპანაძე აცხადებს, მათ დაკავებულებთან კითხვები ერთ-ერთი მსჯავრდებულის გადამალვის თაობაზე ექნებათ.
"საგამოძიებო კომისია პრაქტიკულად, ბოლოში გავიდა იმ ნაწილში, რაც ახსნა-განმარტებების მიღებას და ამ მოწმეების გამოკითხვას ეხება. ჩვენ სულ რამდენიმე მოწმე დაგვრჩა, მათ შორის არიან ის ბრალდებულები,რომლებიც ახლა უნდა მოვინახულოთ ციხეში. ესენი არიან ის ადამიანები, რომლებსაც ბრალი ედებათ იმაში, რომ მათ გადამალეს ერთ-ერთი მსჯავრდებული. ჩვენ სწორედ ამ კუთხით გვექნება კითხვები. პრაქტიკულად, ამის შემდეგ კომისიის მიერ ჩატარებული მუშაობა ამოიწურება ახსნა-განმარტებების მიღების ნაწილში და გადავალთ საბოლოო დასკვნის შექმნის პროცესზე", - განაცხადა კაპანაძემ.
