4 წლის ბავშვის განზრახ მკვლელობაში ბრალდებულ უზბეკეთის მოქალაქე ქალს, ბათუმის საქალაქო სასამართლომ პატიმრობა შეუფარდა.
სარა მირბობოიევა მოსამართლე ლევან გელოვანმა პატიმრობაში დატოვა. როგორც დაკავებულის ადვოკატმა ლაშა რომანაძემ განაცხადა, ბრალდებული დუმილის უფლებას იყენებს, ხოლო წარმოდგენილ მტკიცებულებებს სადაოდ მიიჩნევს.
რაც შეეხება სხდომას, დღევანდელ პროცესზე ბრალდების მხარის მიერ საქმეში არსებულ მტკიცებულებების დასაშვებობაზე იმსჯელეს. სასამართლომ პროკურატურის მოთხოვნა დააკმაყოფილა და მტკიცებულებები დასაშვებად ცნო.
პროცესს მოკლული 4 წლის გოგონას ძიძაც ესწრებოდა, რომელიც საქმესთან დაკავშირებით კიდევ ერთი ქალბატონის დასჯას ითხოვს. მისი თქმით, 4 წლის ბავშვს უზბეკეთის ორი მოქალაქე სასტიკად გაუსწორდა და მოკლა.
ცნობისთვის, დაახლოებით ორი თვის წინ, ბათუმში, აეროპორტის გზატკეცილზე ერთ-ერთ დასახლებაში 4 წლის გოგონა დედის მეგობარმა, სავარაუდოდ, ცემის შედეგად მოკლა, გარდაცვლილი ბავშვის ცხედარი პოლიციის განყოფილებაში მიიტანა და სამართალდამცველებს ჩაბარდა.
დაკავებულს ბრალის დადასტურების შემთხვევაში 17 წლამდე თავისუფლების აღკვეთა ემუქრება.
გამოძიება ბრალდებულის წინააღმდეგ სს კოდექსის 109- ე მუხლის მეორე და მესამე ნაწილებით მიმდინარეობს, რაც განზრახ მკვლელობას გულისხმობს. ბრალდებული სასამართლოს გადაწყვეტილებით პატიმრობაში იმყოფება.