4 წლის ბავშვის განზრახ მკვლელობაში ბრალდებული ქალის წინასასმართლო სხდომა ბათუმის საქალაქო სასამართლოში დღეს გაიმართება.
დღევანდელ პროცესზე მოსამართლე ლევან გელოვანი მტკიცებულების დასაშვებობისა და სადაოობის თაობაზე იმსჯელებს. დღესვე გადაწყდება, როდის დაიწყება ამ საქმის არსებითი განხილვა.
მკვლელობაში ბრალდებული ზაორახონ მირბობიევა 14 ივნისს პოლიციას ჩაბარდა, მან გარდაცვლილი ბავშვის ცხედარი პოლიციაში თავად მიიტანა. იგი დანაშაულს აღიარებს.
მოკლული ბავშვი უცხო ქვეყნის მოქალაქეა, იგი საქართველოში დედასთან ერთად ცხოვრობდა. მოგვიანებით დედას დეპორტი გაუკეთეს და საქართველოდან წასვლა მოუწია, ბავშვი კი მის მეგობართან, ბრალდებულთან დატოვა.
დაკავებულს ბრალის დადასტურების შემთხვევაში 17 წლამდე თავისუფლების აღკვეთა ემუქრება.
გამოძიება ბრალდებულის წინააღმდეგ სს კოდექსის 109- ე მუხლის მეორე და მესამე ნაწილებით მიმდინარეობს, რაც განზრახ მკვლელობას გულისხმობს. ბრალდებული სასამართლოს გადაწყვეტილებით პატიმრობაში იმყოფება.