მმართველი გუნდის წარმომადგენელი, „ხორავას ქუჩის“ საქმეზე შექმნილი საგამოძიებო კომისიის წევრი, მამუკა მდინარაძე, აცხადებს, რომ „საგამოძიებო კომისიის სხდომაზე იუსტიციის მინისტრის მიმართ კითხვები იმ შემთხვევაში იქნებოდა, თუკი “ევროპული საქართველოს“ წარმომადგენლებს დღეს სპექტაკლი გამოუვიდოდათ, მაგრამ მათ სპექტაკლი ჩაუვარდათ“.
ამის შესახებ მან განცხადება დღეს ჟურნალისტებთან სხდომის დასრულების შემდეგ გააკეთა, სადაც კომისიის წევრებს გამოკითხვაზე დაბარებულ იუსტიციის მინისტრთან კითხვები არ აღმოაჩნდათ.
„თეა წულუკიანის მიმართ ერთნახევარი კითხვა რომ დაისვა, ეს “ევროპული საქართველოს“ წარმომადგენლების ცაიტნოტში ყოფნას ნიშნავდა. როგორც ჩანს, ისინი დღეს აპირებდნენ დაედგათ რაღაც ახალი პიარ-სპექტაკლი გიორგი გახარიასთან და ირაკლი შოთაძესთან, ამ სპექტაკლის შედეგები შემდეგ თეა წულუკიანისთვის მოეხსენებინათ და ამაზე მოეთხოვათ პასუხი გარკვეული კითხვების ფორმით, რაც არ გამოუვიდათ. ამიტომ აღმოჩნდა, რომ თეა წულუკიანი არაფრისთვის მოიყვანეს,“ - განაცხადა მამუკა მდინარაძემ.
ამასთან, მისივე შეფასებით, შს მინისტრმა და ყოფილმა მთავარმა პროკურორმა ყველა დასმულ კითხვას ამომწურავი პასუხი გასცეს.
შეგახსენებთ, რომ დღეს კომისიის ბოლო სხდომა გაიმართა, სადაც შს მინისტრი და ყოფილი მთავარი პროკურორი გამოკითხეს. ამის შემდეგ კომისია უკვე დასკვნის შემუშავების ეტაპზე გადადის.
