ცოტათი უფრო მეტს მოველოდი, - ასე შეაფასა შინაგან საქმეთა მინისტრმა, გიორგი გახარიამ ხორავას ქუჩაზე მომხდარი მკვლელობის საქმეზე პარლამენტის დროებითი საგამოძიებო კომისიის მიერ დასმული კითხვები. 
როგორც შს მინისტრმა ჟურნალისტებთან განმარტა, მისი უწყება კომისიის დასკვნას ელოდება. ამასთანავე, გახარია აცხადებს, რომ თუ კომისია გამოავლენს ისეთ ხარვეზებს, რომელსაც პირდაპირი მიზეზ-შედეგობრივი ზეგავლენა ჰქონდა ამ საქმის საბოლოო შედეგთან, შინაგან საქმეთა სამინისტრო შესაბამის ზომებს მიიღებს. 
„ჩვენ ოპოზიციურ პარტიებთან არ მოვსულვართ, ჩვენ მოვედით კომისიასთან. ხაზგასმით მინდა აღვნიშნო და მოქალაქეებს ვუთხრა, რომ გამოძიება გრძელდება. სასამართლოში გრძელდება გამოძიების ძირითადი ნაწილი, რომელიც მეორე ინსტანციაშია, გამოყოფილი საქმეც გრძელდება. ჩვენ ერთმნიშვნელოვნად ვამბობთ, ამ ტრაგიკული საქმის ფარგლებში, ყველა კითხვას გაეცემა პასუხი. 
რა თქმა უნდა, გვესმის, რომ საპარლამენტო რესპუბლიკაში ვცხოვრობთ და საპარლამენტო კონტროლის მნიშვნელობა ჩვენთვის კრიტიკულად მნიშვნელოვანია. სწორედ ამიტომ ვართ დღეს აქ და ამიტომ გავეცით ყველა კითხვაზე პასუხი. ყველას კარგად გვესმის, რომ საპარლამენტო საგამოძიებო კომისია იმის დასადგენად შეიქმნა, რომ გამოძიების პროცესში, რომელიც ჯერ არ დასრულებულა, იყო რაიმე სახის ხარვეზები თუ არა. შესაბამისად, ეს არის კომისიის ფუნქცია. დღეს კომისიას პირადად ვუთხარი, თუ კომისია გამოავლენს ისეთ ხარვეზებს, რომელსაც პირდაპირი მიზეზ-შედეგობრივი ზეგავლენა ჰქონდა ამ საქმის საბოლოო შედეგთან, რა თქმა უნდა, შინაგან საქმეთა სამინისტრო შესაბამის ზომებს მივიღებთ. 
ის საგამოძიებო მოქმედებები, რომელიც ჩამოთვალეს, დღეს კომისიას არ აქვს დადგენილი პირდაპირ კავშირში არის თუ არა საბოლოო შედეგთან. მე ვფიქრობ, ამ ეტაპზე, იმ ცოდნების, რაც მაქვს, რომ არა. თუ კომისია, რომელიც 2 თვეზე მეტია მუშაობს, დაადგენს, რომ ასეთი კავშირი იყო, რა თქმა უნდა, ეს ჩვენთვის იქნება მთავარი. კიდევ ერთხელ გავიმეორებ, ჩვენ ველოდებით კომისიის დასკვნას“, - განაცხადა გახარიამ.