„საგამოძიებო კომისიამ ორთვენახევარში დაადგინა ისეთი გარემოება, რომელიც მერვე თვეს დაადგინა გამოძიებამ,“ - ამ განცხადებით „ხორავას ქუჩის“ საქმეზე შექმნილი საგამოძიებო კომისიის წევრმა „ქართული ოცნებიდან“, დიმიტრი ცქიტიშვილმა, შს მინისტრის დღევანდელ კრიტიკას უპასუხა, სადაც გახარია ამბობს, რომ „ორთვენახევარია კომისია მუშაობს და რა ახალი ფაქტორები გამოავლინეთ“ და „ასე თუ გააგრძელეთ, შეიძლება, საგამოძიებო კომისიის მუშაობის შემსწავლელი კომისია დაგვჭირდეს“.
დიმიტრი ცქიტიშვილმა კი კომისიის სხდომაზე ყოფილ და მოქმედ ჩინოვნიკებს მოუწოდა, რომ კომისიის კრიტიკისგან თავი შეიკავონ.
“მინდა, გამოვთქვა შენიშვნა იმასთან დაკავშირებით, რომ, თითქოს, ორ თვეში ვერ დავადგინეთ ახალი გარემოება , თუმცა ვიტყვი, რომ ორთვენახევარში დავადგინეთ ისეთი გარემოება, რომელიც მერვე თვეს დაადგინა გამოძიებამ, რაზეც უკვე ვისაუბრეთ. დავადგინეთ, რომ არის რამდენიმე ცრუ ჩვენება, რომელიც თქვენც დაადგინეთ, მაგრამ ჩვენ უფრო ცოტა დრო დაგვჭირდა. ჩემი აზრით, კომისიის მიმართ ასეთი დამოკიდებულება არ არის სწორი. პარლამენტი შს სამინისტროს და პროკურატურას ვერ შევეჯიბრებით, მაგრამ კომისიის ფორმატში ბევრი ისეთი ადამიანი იქნა გამოკითხული, რომელმაც მოგვცეს ინფორმაცია, რაც აღმოჩნდა, რომ საქმისთვის მნიშვნელოვან მასალას შეიცავდა. აღმოჩნდა, რომ თქვენ ერთი თვით დაგვასწარით და ეს იცოდით, თუმცა, თქვენ ეს დაადგინეთ მერვე თვეს და ჩვენ მუშაობიდან მეორე თვეში,“ - მიმართა ცქიტიშვილმა.