პარტიული ცხოვრებით არ მიცხოვრია აქამდე და დავით უსუფაშვილს ვუთხარი, რომ ამას არც მომავალში ვაპირებ, - ამის შესახებ საქართველოს პრეზიდენტმა გიორგი მარგველაშვილმა დღეს გამართულ ბრიფინგზე განაცხადა.
მისი თქმით, უსუფაშვილის მოსაზრებების დიდ ნაწილს იზიარებს, თუმცა პარტიული ცხოვრებისთვის ამ ეტაპზე მზად არ არის.
„ბატონ დავითთან მქონდა არაერთი შეხვედრა, მქონდა აგრეთვე შეხვედრა სხვა პოლიტიკოსებთან, მათ შორის თავისუფალ დემოკრატებთან. ბატონი დავითი გეგმავს პარტიის შექმნას. მე პარტიული ცხოვრებით არ მიცხოვრია აქამდე და მას ვუთხარი, რომ ამას არც მომავალში ვაპირებ. ძალიან საინტერესო შეხვედრა იყო. ქვეყანაში სისტემურ პრობლემებზე, ინსტიტუტების შესუსტებაზე, პოლიტიკური ცხოვრების შესუსტებაზე, იმაზე, თუ რა როლი შეიძლება თითოეულმა ჩვენგანმა ვითამაშოთ ქვეყნის გაძლიერებაში, ამის შესახებ ბატონი დავითის შეფასებების ძირითად ნაწილს ვიზიარებ, თუმცა რაც შეეხება პოლიტიკური პარტიის მშენებლობას და პარალელურად, ამ ტაქტიკით ერთად მოძრაობას, ვთვლი, რომ ამ ეტაპზე ამისთვის მზად არ ვარ“,-განაცხადა გიორგი მარგველაშვილმა.
