ხორავას ქუჩაზე მოკლული დავით სარალიძის მამა, ზაზა სარალიძე პრემიერ მინისტრთან, მამუკა ბახტაძესთან შეხვედრას ისევ ითხოვს. როგორც ის "ჯი-ეიჩ-ენთან" საუბარში აცხადებს, პრემიერთან შეხვედრა და საუბარი სურს.
"პრემიერ მინისტრს მინდა პირადად დავუსვა კითხვა, იღებს თუ არა საკუთარ თავზე პასუხისმგებლობას რომ ეს საქმე ბოლომდე იქნება გამოძიებული?", - აცხადებს სარალიძე.
ის 5 აგვისტოს სტრასბურგში მიემართება, სადაც საერთაშორისო სახალხო დამცველსა და ადვოკატებს შეხვდება.
"ამ საქმესთან დაკავშირებით, სტრასბურგში მივდივარ და იქ გავაცნობ საერთაშორისო უფლებადამცველებს საქმის მასალებს. ეს იქნება ზეპირი შეხვედრა და ნიადაგის მომზადება, რომ სტრასბურგმა განიხილოს ეს თემა",- აცხადებს სარალიძე.
ის პარლამენტის დროებითი საგამოძიებო კომისიის მუშაობით კმაყოფილია.
"კომისია კარგად მუშაობს, მომწონს მათი მუშაობა, მაგრამ ვნახოთ რა შედეგს დადებენ და ამ შედეგს რამდენად გაიზიარებს პროკურატურა. საბოლოო ჯამში ეს თემა მაინც პროკურატურამ უნდა განიხილოს. როგორც ვხედავ, პროკურატურა კბილებით იცავს ამ საქმეს და დანარჩენი გარემოებების გამოკვეთა არ უნდა. სააპელაციო სასამართლოშიც იგივე მოცემულობების გატანა უნდათ, რაც აქამდე იყო, მაგრამ ფაქტია ყველაფერი აერ-დაერიათ", - დასძენს სარალიძე.