გამოძიება შეეცადა თითო წვეთი სისხლი ან ბიოლოგიური მასალა სადმე მიეცხო, - აცხადებს თემქაზე ანა ნაცვლიშვილის მკვლელობის საქმეზე ბრალდებულ ლადო გრიგალაშვილის ადვოკატმა, ნაირა ოტიაშვილმა.
ის ვარაუდობს, რომ გამოძიებამ საქმის მასალები გააყალბა. ადვოკატისთვის ეჭვს იწვევს ის გარემოება, რომ მკვლელობის იარაღის - დანის ტარზე მოკლულის ბიოლოგიური მასალაა აღმოჩენილი.
"სისხლის ლაქების აღმოჩენა ორ ქურთუკსა და სვიტერზე სრულიად არალოგიკურია. სისხლი ან ერთზე უნდა აღმოჩენილიყო, ან მეორეზე. სახლიდან ამოღებულ ტანსაცმელზე, ასევე იმაზე, რაც გრიგალაშვილს ეცვა, თითო წვეთი სისხლი გამოძიებამ არ დაინანა.
იმ შემთხვევაში, თუკი გრიგალაშვილს დანაშაულის ჩადენის დროს ეს ტანსაცმელი ეცვა, ხომ არ შეიძლება ასეთი მკვლელობის დროს ერთი წვეთი სისხლი ქურთუკს შიდა მხრიდან მიცხებოდა.
გამომძიებელმა თქვა, ბინის ჩხრეკისას ამოვიღე ტანსაცმელი, რომელსაც ვიზუალური დათვალიერებით სისხლის ლაქები არ ჰქონდაო", - აცხადებს ოტიაშვილი.
შეგახსენებთ, რომ თბილისში, თემქაზე 20 წლის ანა ნაცვლიშვილის მკვლელობის საქმეზე მისი შეყვარებული, ლადო გრიგალაშვილი დააკავეს, ის ჩადენილ დანაშაულს არ აღიარებს და დუმილის უფლებით სარგებლობს.
