ხორავას ქუჩაზე მოზარდების მკვლელობის საქმესთან დაკავშირებით დაკავებული არასრულწლოვნისთვის, დ.ღ.-სთვის აღკვეთის ღონისძიების შეფარდებაზე სასამართლო დღეს იმსჯელებს.
პროცესი თბილისის საქალაქო სასამართლოში 12:00 საათზეა ჩანიშნული.
ბრალდების მხარე ცრუ ჩვენების მიცემისთვის ბრალდებულ დ.ღ.-ს მიმართ აღკვეთის ღონისძიების სახით პატიმრობის შეფარდებას ითხოვს. როგორც დ.ღ.-ს ადვოკატი აცხადებს, ბრალდებული ბრალს ნაწილობრივ აღიარებს.
ცნობისთვის, ხორავას ქუჩაზე ორი მოზარდი 2017 წლის 1-ელ დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა, მეორე კი, 2 დეკემბერს, საავადმყოფოში დაიღუპა.
აღნიშნულ საქმეზე სასამართლოს მიერ ბრალდებული გ.ბ. ცნობილი იქნა დამნაშავედ ლევან დადუნაშვილის განზრახ მკვლელობაში და სასჯელის ვადად 10 წლითა და 6 თვის ვადით თავისუფლების აღკვეთა შეეფარდა.
მეორე ბრალდებულს გ.ჯ.-ს, მას სასჯელის სახით 9 წლით და 9 თვით თავისუფლების აღკვეთა განესაზღვრა.
ხელახალი ძიების ფარგლებში შსს-მ საქმეზე დ.ღ.-ს გარდა, დანაშაულის შეუტყობინებლობის ბრალდებით პროკურატურის ყოფილი მაღალჩინოსანი მირზა სუბელიანი და მოწმეზე ზემოქმედების მოხდენის ბრალდებით მერაბ მორჩაძე დააკავა.