თბილისის საქალაქო სასამართლოში ხორავას ქუჩაზე მომხდარი მკვლელობის საქმეზე, დანაშაულის დაფარვის ეპიზოდის განხილვა გრძელდება. როგორც პროცესის დაწყებამდე საქმის პროკურორმა, გიორგი ქობულაძემ განაცხადა, დღევანდელ პროცესზე ბრალდების მხარე ვიდეომტკიცებულებებს გამოიკვლევს.
"დღეს, გამოიკვლევენ ვიდეოჩანაწერს. კერძოდ, ეს არის ის ვიდეოჩანაწერი, რომელიც განთავსებულია ბრალდებულ კალანდიების სახლის მიმდებარე ტერიტორიაზე და ასახავს ეზოში შემავალი და გამომსვლელი პიროვნებებისა და მანქანების მოძრაობას. ეს ჩანაწერი იქნება დღევანდელ პროცესზე გამოკვლეული. ამ კადრებში ჩანს ლუკა კალანდია, როგორ გამოაქვს მას ის ობიექტები, რომლებიც შემდეგ გაანადგურა. დასაკითხი მოწმეები კიდევ დარჩნენ",-განაცხადა ქობულაძემ.
ცნობისთვის, პირველ დეკემბერს ხორავას ქუჩაზე მომხდარი მკვლელობიდან რამდენიმე დღეში შსს-მ მკვლელობის დაფარვისთვის და პოლიციისთვის შეუტყობინებლობის ბრალდებით 3 ადამიანი დააკავა, მათ შორის ერთ-ერთი შსს-ს ყოფილი თანამშრომელი თენგიზ კალანდიაა, რომელიც მოზარდ მ.კ.-ს მამაა.
