“დავით ჭიჭინაძის პარტიიდან გარიცხვა ჩემთვის პიროვნულად ძალიან რთული გადაწყვეტილება იყო, მაგრამ პიროვნული დამოკიდებულების მიღმა არსებობს ინტერესი, რასაც მმართველი გუნდის სტაბილურობა ჰქვია,” - ამის შესახებ ჟურნალისტებს „ქართული ოცნების“ დეპუტატმა, ვიცე - სპიკერმა გია ვოლსკიმ, განუცხადა.
მისი თქმით, დავით ჭიჭინაძე თავისი შეხედულებებითა და გამონათქვამებით გუნდის სხვა წევრების მოსაზრებებს დაუპირისპირდა, რაც გუნდის შიგნით სტაბილურობას უქმნიდა საფრთხეს და ეს კი სახელმწიფო ინტერესებში არ შედის. ამასთან, ის აქცენტს იმაზე აკეთებს, რომ გადაწყვეტილება „გაბრაზების გამო არ არის მიღებული“.
„არის შეხედულებები, რომლებიც ერთმანეთს არ შეესაბამება და გადაწყვეტილება მიღებული უნდა იყოს. საუბარი თავისუფლების შეზღუდვაზე არ არის, ლაპარაკია პრინციპების განსხვავებაზე. სახელმწიფოში მთავარი მმართველი გუნდის სტაბილურობის შენარჩუნებაა. უამრავი ფორმატია, სადაც შეგვიძლია, ჩვენი განსხვავებული აზრები ერთმანეთს დავუპირისპიროთ და საკმაოდ ჯანსაღი სიტუაციაა იმისთვის, რომ ნებისმიერ საკითხზე ნებისმიერი სიმწვავით ვიკამათოთ, მაგრამ დამოკიდებულების გამოხატვის ფორმები არსებობს, რასაც პარტია თავის წევრისგან მოითხოვს,“ - განაცხადა გია ვოლსკიმ.