ჩვენ ვმუშაობთ შახტის დახურვის პროცედურებთან დაკავშირებით და ასევე ხდება დოკუმენტაციის შესწავლა. მიმდინარეობს კონსულტაციები როგორც კომპესაციებზე, ასევე ხელფასების გაცემასთან დაკავშირებით, - ამის შესახებ საქართველოს შრომის, ჯანმრთელობისა და სოციალური დაცვის მინისტრის მოადგილე თამილა ბარკალაიამ განაცხადა.
მან ტყიბულში, მინდელის შახტში დაღუპულების ოჯახებს უსამძიმრებს.
მისი თქმით, მარტივი არ არის, მიიღო ტყიბულის შახტის დახურვის გადაწყვეტილება, რომელიც 1 500 ადამიანს ეხება და მთლიანად რეგიონისათვის შემოსავლის წყაროს წარმოადგენს.
„სამძიმარს ვუცხადებ გარდაცვლილთა ოჯახებს. არც ერთი დასაქმებულის სიცოცხლედ არ ღირს არც ერთი ბიზნესი. რაც შეეხება შახტის დახურვას, მარტივი არ არის, მიიღო ისეთი გადაწყვეტილება, რომელიც ეხება 1 500 ადამიანს და მთლიანად რეგიონისათვის წარმოადგენს შემოსავლის წყაროს. შრომის საერთაშორისო ორგანიზაციას რეკომენდაციით მივმართეთ, შეირჩევიან საერთაშორისო ექსპერტები, რომლებიც მოახდენენ შახტის შესწავლას, რადგან ადამიანის სიცოცხლე არის უპირველესი პრიორიტეტი. თქვენ მოისმინეთ პრემიერის გადაწყვეტილება. ჩვენ ვმუშაობთ შახტის დახურვის პროცედურებთან დაკავშირებით და ასევე ხდება დოკუმენტაციის შესწავლა. მიმდინარეობს კონსულტაციები როგორც კომპესაციებზე, ასევე ხელფასების გაცემასთან დაკავშირებით“, – განაცხადა ჯანდაცვის მინისტრის მოადგილემ.