პრემიერმინისტრის მიერ წარდგენილ კანდიდატებში პოლიტიკური წონის მქონე ფიგურებს და პოლიტიკურ სახეებს ვერ ვხედავთ, – ამის შესახებ „ევროპული საქართველოს“ წევრმა, სერგო რატიანმა განაცხადა.
მისი თქმით, გარკვეულწილად, ეს ტექნიკური მთავრობის მსგავსია. შესაბამისად, არ ჩანს პერსპექტივას, რომ მათ ჰქონდეთ შესაძლებლობა და ძალა გაატარონ რეფორმები, რომელიც ქვეყანას დღეს სჭირდება.
მისივე თქმით, სასჯელაღსრულებისა და პრობაციის ყოფილი მინისტრი კახა კახიშვილი მთავრობას ჩამოაცილეს.
„კახა კახიშვილის შემთხვევაში, უფრო უნდა ვისაუბროთ იმაზე, რომ ის ჩამოაცილეს, გაიყვანეს მთავრობიდან. რაც შეეხება დანარჩენ ფიგურებს, ჩვენ ვერ ვხედავთ აქ პოლიტიკურ ფიგურებს, ტექნიკური მთავრობის მსგავსი რაღაც არის, ისინი უფრო მეტად არიან ანგარიშვალდებული ბიძინა ივანიშვილთან და პრემიერის წინაშე და არა ამომრჩევლისა და საზოგადოების წინაშე“, – განაცხადა რატიანმა.
