„მე ვფიქრობ, რომ ჩვენ სწორედ აჭარაში გვაქვს დიდი პოტენციალი იმისა, რომ ის რეფორმები რომელიც დაანონსდა, მოკლე და ოპერატიულ ვადაში სწორედ აჭარაში განვახორციელოთ“, განაცხადა საქართველოს პრემიერ-მინისტრმა აჭარის მთავრობის მეთაურის პოსტზე დასახელებული თორნიკე რიჟვაძის კანდიდატურის შეფასებისას.
როგორც მამუკა ბახტაძემ განაცხადა, თორნიკე რიჟვაძეს მისი სრული მხარდაჭერა ექნება. „უმაღლესი საბჭოს უმრავლესობამ და პოლიტიკურმა გუნდმა, ბევრ ღირსეულ კანდიდატურას შორის, მხარი დაუჭირა თორნიკე რიჟვაძის კანდიდატურას. იცით, რომ თორნიკე რიჟვაძე ბოლო წლების განმავლობაში მუშაობდა ენერგეტიკის სამინისტროში. შემდეგ კი ეკონომიკის სამინისტროში. მან თავი გამოიჩინა, როგორც აქტიურმა და წარმატებულმა ხელმძღვანელმა. მე დარწმუნებული ვარ, რომ ის თავს გაართმევს იმ გამოწვევებს, რაც დღეს ჩვენ გვაქვს აჭარაში“, განაცხადა მამუკა ბახტაძემ.