მთავარი პროკურორის თანამდებობაზე შალვა თადუმაძეს საპარლამენტო უმრავლესობის მხარდაჭერა ექნება, - ამის შესახებ პარლამენტის საპროცედურო საკითხთა კომიტეტის თავმჯდომარე გიორგი კახიანმა საზოგადოებრივს განუცხადა.
მისი განმარტებით, მთავრობას ორკვირიანი ვადა აქვს, რათა პარლამენტს მთავარი პროკურორის კანდიდატურა წარუდგინოს.
მისივე თქმით, თუ მთავრობა შალვა თადუმაძეს წარმოადგენს და ეს ასეც მოხდება, მას საპარლამენტო უმრავლესობა მხარს დაუჭერს.
მისივე განცხადებით, თადუმაძე თავის საქმის პროფესიონალი და კომპეტენტური პირია. მისივე თქმით, მას ადვოკატად მუშაობის დიდი გამოცდილება აქვს და სისხლის სამართლის სფეროც კარგად იცის.
„საკანონმდებლო თვალსაზრისით, მთავარი პროკურორი მთლიანად დამოუკიდებელია და მას ყველანაირი სამართლებრივი გარანტია აქვს, რომ დამოუკიდებელი იყოს. შალვა თადუმაძე მისი პრინციპულობიდან გამომდინარე, დამოუკიდებელი პროკურორი იქნება და გადაწყვეტილებებს კანონის შესაბამისად მიიღებს”, – განაცხადა კახიანმა.
ცნობისთვის, საპროკურორო საბჭომ მთავარი პროკურორობის კანდიდატად შალვა თადუმაძე დღეს შეარჩია.
