მთავრობაში სტრუქტურული ცვლილებები საშუალებას მოგვცემს, 100-120 მილიონი ლარი მნიშვნელოვან სოციალურ პროგრამებზე დაიხარჯოს,- ამის შესახებ პრემიერ-მინისტრობის კანდიდატმა მამუკა ბახტაძემ „ქართული ოცნების“ ოფისში საპარლამენტო უმრავლესობასთან შეხვედრის შემდეგ განაცხადა.

მისი თქმით, მცირე მთავრობის კონცეფცია გულისხმობს მთავრობის ზომის შემცირებას ეკონომიკასთან მიმართებაში.

„მთავრობის კონცეფცია არ გულისხმობს მხოლოდ სამინისტროების რაოდენობის შემცირებას, ეს არის კონცეფცია, თუ რა წილი უნდა ჰქონდეს მას მთლიან შიდა პროდუქტში, მთლიან ეკონომიკაში. ამ კუთხით ჩვენ გვაქვს მნიშვნელოვანი პროგრესი. წელს საორიენტაციოდ ჩვენი ხარჯები ამ მიმართულებით იქნება მთლიანი შიდა პროდუქტის 4,2, 4,3%. მცირე მთავრობის კონცეფცია გულისხმობს მთავრობის ზომის შემცირებას ეკონომიკასთან მიმართებაში ისე, რომ არ აღემატებოდეს 3,9%-ს.

თანხაში ეს ნიშნავს, რომ ჩვენ მომავალში საშუალება მოგვეცემა, საკმაოდ მნიშვნელოვანი თანხა, რომელიც არის 100-120 მილიონი ლარის ფარგლებში, მივმართოთ მნიშვნელოვან სოციალურ პროგრამებზე.

მინდა ხაზი გავუსვა, ვინაიდან გარკვეულწილად არის არასწორი სტერეოტიპი დანერგილი, რომ მცირე ზომის მთავრობა აუცილებლად ნიშნავს მხოლოდ მცირე რაოდენობის სამინისტროებს. ეს უპირველეს ყოვლისა ნიშნავს ეკონომიკაში ხარჯების წილს. შესაბამისად, ჩვენი პროგრამის ფარგლებში ამას დავაფიქსირებთ, თუ რა უნდა იყოს ზედა ზღვარი, რომელიც იქნება ხარჯების ნაწილში გათვალისწინებული და შესაბამისად, ის გამოთავისუფლებული თანხები როგორი მიმართულებით და რა პრიორიტეტებით დაიხარჯება, რომელიც ჩვენი შეხედულებით, რა თქმა უნდა, პირველ რიგში უნდა მოიცავდეს სოციალურ მიმართულებებს“,- განაცხადა მამუკა ბახტაძემ.