გოგონა და ჩემი დაცვის ქვეშ მყოფი შეყვარებულები იყვნენ, პიკნიკებზე დადიოდნენ და შესაძლებელია, ერთი წვეთი სისხლი საიდანღაც მოხვედრილიყო, - განაცხადა ჟურნალისტებთან 20 წლის ანა ნაცვლიშვილის მკვლელობაში ბრალდებულის, ლადო გრიგალაშვილის ადვოკატმა, ნაირა ოტიაშვილმა.
როგორც ის განმარტავს, დანაზე აღმოჩენილი სისხლი შესაძლოა, გამოძიებამ გააყალბა.
"ეს დანა ნანახი იქნა მამის მანქანაში. ცალსახად შემიძლია ვთქვა, რომ ორი შესაძლებლობა არსებობს სისხლის იქ აღმოჩენის, იმ პირობებში, როცა დანის ზომები ჭრილობების ზომებს არ ემთხვევა. გოგონა და ჩემი დაცვის ქვეშ მყოფი შეყვარებულები იყვნენ, პიკნიკებზე დადიოდნენ და შესაძლებელია, ერთი წვეთი სისხლი საიდანმე მოხვედრილიყო. თუმცა, უფრო პრიოროტეტულია ის, რომ მტკიცებულებათა ფალსიფიკაცია მოხდა.
თუ ეს დანა არ არის, რომლითაც გოგონას აქვს ჭრილობები მიყენებული, შესაბამისად, მასზე გოგონას სისხლის კვალი არ უნდა იყოს და თუ არის, მაშინ გამოსაძიებელია, რატომ არის.
ზუსტად ვიცი, რომ მანქანის გასაღები პოლიციას ჰქონდა სანამ კანონიერ ჩხრეკას ჩაატარებდა, მთლიანი მანქანა დაათვალიერა, ნახა სად რა იყო და არ გამოვრიცხავ, დანაზე რომელიც თავის ზომებით მკვლელობის იარაღი არ არის, შესაძლოა ერთი წვეთი სიახლი მოაცხო. თუ დანა გარეცხილია, მაშინ ერთი წვეთიც არ უნდა იყოს", - აცხადებს ოტიაშვილი.
მისი განმარტებით, ჭრილობები რომელიც ნაცვლიშვილს ჰქონდა, მხოლოდ დანით არ არის მიყენებული.
დღეს თბილისის საქალაქო სასამართლოში ლადო გრიგალაშვილის საქმის არსებითი განხილვა დაიწყო. დღევანდელ პროცესზე მხარეები შესავალი სიტყვებით წარსდგებიან.