ხორავას ქუჩაზე სასტიკად მოკლული დავით სარალიძის მამა, ზაზა სარალიძე „ჯი-ეიჩ-ენთან“ საუბარში აცხადებს, რომ შსს-ს სურს, მისი შვილის მკვლელობაში დამნაშავედ უკვე მსჯავრდებული ერთ-ერთ არასრულწლოვანი, გ.ბ. ცნოს.
„შსს-ს უნდა, მსჯავრდებული გ.ბ. აღიარონ ჩემი შვილის მკვლელად. პირდაპირ განვუცხადე, ეს რომ ეცადონ და დაუმტკიცონ, რომ ბარბაქაძე ჩემი შვილის მკვლელია, პირველი წინააღმდეგი მე ვიქნები. ვუთხარი კიდეც, თავდაყირა დაგიყენებთ ყველაფერს, არც კი გაბედოთ, რომ გ.ბ. დათოს მკვლელობის ნაწილში შემოიყვანოთ-მეთქი. ამ თემასთან დაკავშირებით, გამოძიებაში ვისაუბრე. იმედია, ჭკუაზე მოვლენ და ყველაფერს გაითვალისწინებენ“, - აცხადებს სარალიძე.
მისი განმარტებით, შინაგან საქმეთა სამინისტროში დაწყებული ხელახალი გამოძიება მოჩვენებითია.
„შინაგან საქმეთა სამინისტროს გამოძიების ეტაპი არის „ბლეფი“, რასაც აკეთებენ, ყველაფერი მოჩვენებითია. ხელისუფლება იმის გამო გადააყენეს, რომ გადაფარონ ჩემი შვილის და მაჩალიკაშვილის მკვლელობა. ფაქტია, რომ მაქსიმალურად ცდილობენ სუბელიანის და კალანდიას გამოძრომას. ასევე, ფაქტია, რა მოცემულობაც პროკურატურას ჰქონდა, იგივეს გატანა უნდა შინაგან საქმეთა სამინისტროსაც. ამდენი ტყუილები ნეტა თუ არ მობეზრდათ!
არანაირი იმედი არ მაქვს, რომ შსს ამ საქმეს გამოიძიებს. მინისტრის მოადგილემ, მეზვრიშვილმა განაცხადა, ამ საქმეს სააპელაციო სასამართლოში გავიტანთო და მერე დაკითხვაზე მიბარებენ. რას მიბარებენ ამ დაკითხვაზე, ან იმ ხალხს რას აწვალებენ? მეზვრიშვილმა ფაქტობრივად მოსამართლე დაადანაშუალა იმაში, რომ მცდარი განაჩენი გამოიტანა, მეროე ინსტანციაში დავამტკიცებთ ჩვენს სიმართლესო. იგივე უნდათ დაამტკიცონ, ეს დიდი სისულელეა. ამიტომ მიჩნდება ეჭვები. საერთოდ, არაფერს აკეთებენ“, - აცხადებს სარალიძე.
ცნობისთვის, პირვველ დეკემბერს, ხორავას ქუჩაზე მოზარდებს შორის სისხლიან დაპირისპირებას ორი არასრულწლოვნის, ლევან დადუნაშვილისა და დავით სარალიძის სიცოცხლე ემსხვერპლა.
არასულწლოვანის, ლევან დადუნაშვილის განზრახ მკვლელობაში დამნაშავედ ცნობილ გ.ბ-ს სასამართლომ 10 წელი 6 თვე მიუსაჯა, ხოლო დამამძიმებელ გარემოებაში არასრულწლოვან დავით სარალიძის განზრახ მკვლელობის მცდელობაში ბრალდებულ გ.ჯ.-ს 9 წელი და 9 თვე მიესაჯა.
სასამართლოს ამ გადაწყვეტილებით, სარალიძის მკვლელობაში დამნაშავე პირი დაუდგენელია. სწორედ ამას აპროტესტებს მოკლულის მამა, ის დამნაშავეების დასჯას ითხოვს.
