2017 წელს საქართველოში 31 ელევატორი ფუნქციონირებდა, რომელთა უმრავლესობაც (41,9%) შიდა ქართლის რეგიონში იყო განთავსებული. ელევატორების 32,3% ფუნქციონირებს ქვემო ქართლში, 12,9% - ქ. თბილისში, 9,7% - სამეგრელო-ზემო სვანეთის რეგიონში, ხოლო დანარჩენი 3,2% გურიაში.
„საქსტატის“ ინფორმაციით, 2017 წლის განმავლობაში, ელევატორებში მომსახურება გაეწია 42 მომხმარებელს. მწარმოებელთა და გადამყიდველთა რაოდენობამ, რომელთაგანაც შესყიდულ იქნა პროდუქცია - 102 ერთეული შეადგინა, ხოლო ელევატორებში დასაქმებულთა საშუალო წლიური რაოდენობა 1087 კაცით განისაზღვრა.
2017 წლის განმავლობაში, ელევატორებში შენახული (განთავსებული) იყო 742,0 ათასი ტონა პროდუქცია, რომლის 80,7%-ს წარმოადგენდა ხორბალი, 7,2%-ს სოიოს შროტი, 5,3%-ს სიმინდი, 2,4%-ს ალაო, 2,9%-ს ხორბლის ფქვილი, ხოლო დანარჩენ პროდუქციას უმნიშვნელო წილი ჰქონდა.
2017 წლის განმავლობაში, ელევატორების მიერ გაყიდულია 211,6 მლნ ლარის ღირებულების 349,2 ათასი ტონა პროდუქცია, საიდანაც 70,0% იყო ადგილობრივი (საკუთარი წარმოების).
მომსახურების საფასურმა 1,3 მლნ. ლარი შეადგინა, ხოლო გადამუშავებასა და შენახვაზე გაწეულმა დანახარჯებმა კი - 2,6 მლნ. ლარი.
2017 წლის განმავლობაში ელევატორების მიერ გაყიდული იმპორტირებული პროდუქციის დიდი ნაწილი ხორბალზე მოდიოდა - 57,2%.
ადგილობრივი წარმოშობის (საკუთარი წარმოების) პროდუქციაში მოცულობის მიხედვით ჭარბობდა ფქვილი (რომელზეც მოდიოდა ელევატორების მიერ გაყიდული ადგილობრივი პროდუქციის 86,4%) და ქატო (13,0%). ელევატორების მიერ გაყიდული პროდუქციიდან უცხოურ ბაზარზე რეალიზებული იქნა სოიოსა და მზესუმზირის შროტი.
გამოკვლევის შედეგების მიხედვით, ელევატორების საცავების საშუალო დღიურმა დატვირთვამ (პროცენტულად საცავების ჯამური ტევადობიდან) 41,1% შეადგინა იანვარში, 40,5,0% - თებერვალში, 36,7% - მარტში, 29,8% - აპრილში, 30,2% - მაისში, 32,7% - ივნიში, 41,8% - ივლისში, 42,9% - აგვისტოში, 37,7% - სექტემბერში, 37,9% - ოქტომბერში, 37,6% ნოემბერში, ხოლო 37,3% - დეკემბერში.
ელევატორების 29,0% თანამედროვე ტექნოლოგიებით აღჭურვილია სრულად, 29,0% - ნაწილობრივ, ხოლო 42,0% საერთოდ არ არის აღჭურვილი თანამედროვე ტექნოლოგიებით.
სესხით სარგებლობს ელევატორების 45,2%. აქედან 35,7%-ს სესხი აღებული აქვს ძირითადი კაპიტალისთვის (ახლის შეძენის ან არსებული გაუმჯობესების მიზნით), 64,3%-ს საბრუნავი კაპიტალისათვის.
ელევატორების 15,9% თვლის, რომ ყველაზე მნიშვნელოვან გავლენას კონკურენტუნარიანობაზე შესაბამისი მოწყობილობის/ტექნოლოგიის უქონლობა ახდენს. 14,8% მნიშვნელოვან ფაქტორად მომსახურებაზე დაბალი მოთხოვნას ასახელებს, 14,5% - სუსტ კავშირს მწარმოებლებთან, 14,1% - კომუნალური გადასახადების სიდიდეს, 13,8% - თანამშრომელთა კვალიფიკაციას ასახელებს, 13,5% ფინანსურ რესურსებზე სუსტ ხელმისაწვდომობას და 13,4% სახელმწიფო გადასახადების სიდიდეს.
