დღეს ათენში საზოგადოებრივი ტრანსპორტი გაიფიცება. დღის განმავლობაში რამდენიმე საათით ავტობუსის და ტროლეიბუსის მძღოლები ასევე მეტროს თანამშრომლები შეწყვეტენ მუშაობას. აღსანიშნავია, რომ ათენში უკვე მეორე დღეა რაც ტაქსის მძღოლები ატარებენ გაფიცვას.
გაფიცვა მიმართულია მთავრობის კანონპროექტის წინააღმდეგ ეკონომიის ახალ ზომებთან დაკავშირებით, რომლის მიღებაც აუცილებელია საბერძნეთის მესამე ფინანსური პროგრამის დასრულებისთვის.
ცნობისთვის, მეტრო იმუშავებს დილის 9 საათიდან საღამოს 9 საათამდე. 12:00-დან 17:00 საათამდე ავტობუსის მძღოლები, ხოლო - 12:00 დან 16:00 საათამდე ტროლეიბუსის მძღოლები შეწყვეტენ მუშაობას.
ტაქსის მძღოლები უკვე მეორე დღეა აპროტესტებენ საბერძნეთში „Uber“-ის მომსახურებას. მათ განაცხადეს, რომ „Uber“-ის სერვისი შეამცირებს მათ საქმეს და ხელისუფლებას 2011 წლის გაფიცვა შეახსენეს. მაშინ საბერძნეთის ტაქსის მძღოლები თითქმის სამ კვირას აპროტესტებდნენ. რის შემდეგაც მათ ბლოკირება მოახდინეს აეროპორტის და პორტის ტერიტორიების, ასევე გადაკეტეს გზები და ხიდები.
