მთელი საქართველოს გასაგონად აცხადებთ, რომ იგი არის ბრალდებული, უნდა გამოიძიოთ ყველაფერი, რა მოხდა, რატომ იყო ეს ყველაფერი პროვოკაცია და რა შუაში იყო აზერ სულეიმანოვი, რომელიც მხოლოდ და მხოლოდ ერთ პროცედურაში მონაწილეობდა, რომელსაც ჰქვია ვითარების გარკვევა და იყო თუ არა ეს პროვოკაცია თუნდაც „ნაციონალური მოძრაობის“ წინააღმდეგ, - ამის შესახებ „ნაციონალური მოძრაობის“ წევრმა რომან გოცირიძემ მარნეულში მომხდარ ფაქტთან დაკავიშირებით, პარლამენტის პლენარულ სხდომაზე განაცხადა.
„აზერ სულეიმანოვმა მითხრა, რომ მან არ იცის, რა ხდება, რომ აღძრულია სისხლის სამართლის საქმე დეპუტატის წინააღმდეგ. შემთხვევა იყო შემდეგი - ეს ახალგაზრდა, რომელსაც მართლაც მოექცნენ საშინლად, თურმე ყოფილა „ქართული ოცნების“ წევრი და თქვენი აქტივისტი, რომელიც გამოვიდა მიტინგზე, შემდეგ მოხდა ამ ახალგაზრდის დაბარება შეიხის, აზერ სულეიმანოვისა და საკრებულოს მაჟორიტარი დეპუტატების მიერ. აზერ სულეიმანოვი მათ სასულიერო ლიდერთან ერთად მონაწილეობდა ამ ახალგაზრდობასთან საუბარში. სულეიმანოვი იცნობს ამ ბიჭს, ექვსი წლის განმავლობაში „ქართული ოცნების“ მხარდამჭერი, „ნაციონალური მოძრაობის“ წინააღმდეგ მებრძოლი იყო. კითხვა იყო ერთადერთი, რატომ მონაწილეობს „ნაციონალური მოძრაობის“ სახელით და რატომ აკეთებს განცხადებებს. ამისთვის შეიხი დაბარებულია პროკურატურაში, ახლა იმყოფება რუსთავის პროკურატურაში. აზერ სულეიმანოვი არის გაკვირვებული, ამისთვის აღიძრა სისხლის სამართლის საქმე. მთელი საქართველოს გასაგონად აცხადებთ, რომ იგი არის ბრალდებული, უნდა გამოიძიოთ ყველაფერი, რა მოხდა, რატომ იყო ეს ყველაფერი პროვოკაცია და რა შუაში იყო აზერ სულეიმანოვი, რომელიც მხოლოდ და მხოლოდ ერთ პროცედურაში მონაწილეობდა, რომელსაც ჰქვია ვითარების გარკვევა და იყო თუ არა ეს პროვოკაცია თუნდაც „ნაციონალური მოძრაობის“ წინააღმდეგ. ეს მითხრა ახლა აზერმა ტელეფონით. ამას ჩვენ გავარკვევთ და არავის არ მოგცემთ იმის უფლებას, რომ პოლიტიკური ნიშნით დევნოთ და გამოიგონოთ ახალ-ახალი იურიდიული ტერმინები, როგორიც არის განრიდება, თუ არიდება და ა.შ”, – განაცხადა რომან გოცირიძემ.
ცნობისთვის, პროკურატურამ დამამცირებელი და არაადამიანური მოპყრობის ფაქტზე მარნეულის მერი დააკავა, ხოლო ცემის ფაქტზე სისხლისსამართლებრივი დევნა დაიწყო საქართველოს პარლამენტის წევრის "ენმ"-დან აზერ სულეიმანოვის და კიდევ 2 პირის მიმართ.