ტანსაცმელზე სამკუთხა, ზიგზაგისებური დაზიანებებია მიყენებული, რაც აბსოლუტურად გამორიცხავს მხოლოდ დანების მოქმედებას - განაცხადა "ჯი-ეიჩ-ენთან" ხორავას ქუჩაზე მოკლული დავით სარალიძის მამამ, ზაზა სარალიძემ.
მისი განმარტებით, დამოუკიდებელი ექსპერტის, მაია ნიკოლეიშვილის დასკვნით იკვეთება, რომ პროკურატურამ ის დაზიანებები დამალა, რაზეც ექსპერტი თავის დასკვნაში საუბრობს.
"კერძო ექპსერტის, მაია ნიკოლეიშვილის დასკვნიდან აბსოლუტურად ნათლად დგინდება ის ფაქტი, რომ პროკურატურამ და სამხარაულის ექსპერტიზამ კონკრეტული ჭრილობების სასამართლოზე წარმოდგენა დამალა, რა დაზიანებებიც ჩემი შვილის ტანსაცმელსა და შესაბამისად, სხეულზეა მიყენებული, გამოკვლეული არ იქნა. რატომ დამალა სამხარაულის ექსპერტიზამ, პროკურატურამ ეს კონკრეტული დაზიანებები და რატომ არ წარმოაჩინა სასამართლოში? ჩავთვალოთ, რომ კერძო ექსპერტი მიკერძოებულია, თუმცა, ჩემი მთავარი კითხვა პასუხგაუცემელია, რატომ დაიმალა ეს ფაქტები და რატომ არ იქნა ეს დაზიანებები გამოკვლეული? ჩემთვის ძალიან მნიშვნელოვანი იქნება ასევე, ბრიტანელი ექსპერტების მიერ გაკეთებული დასკვნაც", - აცხადებს სარალიძე.
ის საზოგადოებას ხვალ დაანონსებულ აქციაზე მისვლისკენ მოუწოდებს.
"აქცია საღამოს 7 საათზე გაიმართება და მოვუხმობ უბრალო ადამიანებს, გვერდით დამიდგნენ და როგორმე ის ჭეშმარიტება დავადგინოთ, რასაც პროკურატურა მალავს", - დასძენს სარალიძე.
ცნობისთვის, 2017 წლის პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის, დავით სარალიძისა და ლევან დადუნაშვულის სიცოცხლე ემსხვერპლა.
