ბათუმის მერი ლაშა კომახიძე საქართველოს დამოუკიდებლობის დღისადმი მიძღვნილ საზეიმო ღონისძიებებს შვილთან ერთად დაესწრო.
„გილოცავთ საქართველოს დამოუკიდებლობის დღეს, 26 მაისს! ვულოცავ ამ დღეს მთელ საქართველოს! განსაკუთრებით კი, მინდა მივულოცო ჩვენი ქვეყნის ჯარისკაცებს, რომლებიც სამშობლოს სადარაჯოზე დგანან. თითოეული ჩვენგანისთვის 26 მაისი არის უმნიშვნელოვანესი დღე, რომელსაც ყველა ერთად ვზეიმობთ. ზუსტად 100 წლის წინ, 1918 წელს, ჩვენი წინაპრების დამსახურებით საქართველომ დამოუკიდბლობა გამოაცხადა. 26 მაისი არის უმნიშვნელოვანესი თარიღი და მონაპოვარი ჩვენი ქვეყნის ისტორიაში. ჩვენი ვალდებულებაა გავუფრთხილდეთ და დავიცვათ ჩვენი ქვეყნის დამოუკიდებლობა. ვუსურვებ საქართველოს გამთლიანებას, მშვიდობასა და გაძლიერებას“ - ლაშა კომახიძე.
ღონისძიების ფარგლებში, ბათუმის მერმა და მთავრობის წარმომადგენლებმა სიმბოლურად ხელი მოაწერეს საქართველოს დამოუკიდებლობის აქტს.
ანბანის კოშკის მიმდებარედ გაიმართა დამოუკიდებლობის დღისადმი მიძღვნილი სამხედრო აღლუმი.
საოცრებათა პარკში მოწყობილ სადღესასწაულო სივრცეებში წარმოდგენილია საქართველოს დამოუკიდებლობის 1918–1921 წლების ამსახველი ფოტოგამოფენა, საქართველოს თავდაცვის სამინისტროს მიერ სამხედრო ტექნიკის ჩვენება და სანაპირო ზოლზე საგანგებო სიტუაციების მართვის სამსახურის გამოფენა.
საზეიმო ღონისძიებებში მონაწილეობა მიიღეს საერთაშორისო ფესტივალ „ოქროს დელფინის“ მონაწილეებმაც, რომლის ფარგლებშიც ბათუმს 13 ქვეყნის 18 შემოქმედებითი ჯგუფი სტუმრობს.
26 მაისისადმი მიძღვნილი ღონისძიებების ფარგლებში, მთელი დღის განმავლობაში, გაიმართება ლიტერატურული პერფორმანსები, ლექციები, ადგილობრივი წარმოების პროდუქციის გამოფენა-გაყიდვა, სხვადასხვა სპორტული აქტივობა და საბავშვო ღონისძიებები. ასევე, საჭადრაკო ოლიმპიადის საორგანიზაციო კომიტეტის მიერ ანბანის კოშკის მიმდებარე ტერიტორიაზე მოწყობილია საჭადრაკო კუთხე, პარალელურად კი, იმართება ხატვის სეანსები საჭადრაკო თემაზე და შესრულებული ნახატების გამოფენა. დღევანდელი დღისთვის დაუკრავს ბათუმის სასულე ორკერსტრი, წარმოდგენილი იქნება ფოლკლორული ნომრები.
საქართველოს დამოუკიდებლობის დღეს მიეძღვნება ფლეშმობი, რომელზეც შესრულდება საქართველოს ჰიმნი და ქორეოგრაფიული ნომერი.
დღევანდელ დღეს ბათუმის ბოტანიკურ ბაღში ვარდების გამოფენა მიეძღვნება, სადაც წარმოდგენილი იქნება ვარდის 17 სახეობა და 145 კულტურული ფორმა.
საქართველოს დამოუკიდებლობის დღისადმი მიძღვნილ ღონისძიებებს აჭარის მთავრობის თავმჯდომარე ზურაბ პატარაძე, უმაღლესი საბჭოს თავმჯდომარე დავით გაბაიძე, მთავრობის, მუნიციპალიტეტისა და დიპლომატიური კორპუსის წარმომადგენლები დაესწრნენ.