განვლილი საუკუნეების მსგავსად, უკანასკნელი 100 წელიც არ ყოფილა იოლი საქართველოსთვის - სავსე იყო გამოწვევებით, თავისუფლებისთვის ბრძოლით, - ამის შესახებ საქართველოს პრემიერ-მინისტრმა გიორგი კვირიკაშვილმა მრგვალი მაგიდის - „თანამშრომლობა კეთილდღეობისთვის - მომავლის ასწლეულის სტრატეგია“ სიტყვით გამოსვლისას განაცხადა.
მისი თქმით, დღესაც საქართველო ევროპული ფასეულობების ერთგულია
მისივე განცხადებით, უდიდესი მსხვერპლის ფასად ჩვენმა ქვეყანამ შეძლო ის, რომ 1991 წლის 31 მარტს აღედგინა დამოუკიდებლობა და შემდგომ უკვე 26 მაისს მთელი საქართველოს მასშტაბით, საერთაშორისოდ აღიარებული საზღვრების ფარგლებში დამტკიცდა ქვეყნის სრულიად ახალი ტრაექტორია, რომელიც უკვე ევროპაში და ევროატლანტიკურ სივრცეში ინტეგრაციას გულისხმობს.
„ჩვენი ქვეყნის ისტორიულ მეხსიერებაში არაერთი ბრძოლაა შემორჩენილი, თუმცა განსაკუთრებული იყო 1918 წლის 26 მაისი და 100 წლის წინ პირველი დემოკრატიული რესპუბლიკის მთავრობის თავმჯდომარე ნოე ჟორდანია თავის გამოსვლაში აღნიშნავდა: „აქტი 26 მაისისა არ ყოფილა აქტი შემთხვევითი, აქტი უცაბედითი, აქტი მოგონილი რომელიმე პირის, ჯგუფის ან პარტიის მიერ, არა ბატონებო, ეს აქტი იყო ისტორიის აუცილებლობისა და ხალხის გულიდან ამოხეთქილი. ამ აქტით საქართველო გადაურჩა განადგურებას. დღეს ჩვენ შეგვიძლია შევიდეთ ევროპიულ ხალხთა ოჯახში პირდაპირ, სრულიად უშუამავლოდ. დღეს ჩვენ უკვე ამ გზაზე ვართ, ჩვენ ჩვენის ნებით არ გადავუხვევთ“. ძალიან მნიშვნელოვანი და ამაღელვებელი სიტყვებია ჭეშმარიტად, რომელიც ჯერ კიდევ 100 წლის წინ გამოხატავდა საქართველოს ევროპულ მისწრაფებას. ჩვენ ნამდვილად გვეამაყება, რომ საქართველომ იმ 3 წლის განმავლობაში შეძლო მიეღო ჭეშმარიტად ევროპული, დემოკრატიულ პრინციპებზე დამყარებული კონსტიტუცია, დაეფუძნებინა პარლამენტი, რომელიც სქესის, ეროვნების, სარწმუნოებისა და სოციალური მდგომარეობის მიუხედავად აძლევდა უნივერსალურად საარჩევნო ხმას ყველა მოქალაქეს და ამ არჩევნების საფუძველზე იქნა შედგენილი პირველი პარლამენტი, რომელიც რა თქმა უნდა, თავის საზღვრებში თანაბრად უზრუნველყოფდა ყველა მოქალაქის სამოქალაქო და პოლიტიკურ უფლებებს. მაშინ ქართულმა საზოგადოებამ ჰარმონიულად შეისისხლხორცა ევროპული დემოკრატიული ფასეულობები და მრავალწლიანი საბჭოთა ოკუპაციის მიუხედავად, ამ ღირებულებების გამტარებელი დარჩა. დღესაც საქართველო ევროპული ფასეულობების ერთგულია“, - აღნიშნა გიორგი კვირიკაშვილმა.