ევროკავშირის ელჩმა იანოშ ჰერმანმა საქართველოს მოქალაქეებს დამოუკიდებლობის დღეს ქართულ ენაზე მიულოცა.
დიპლომატმა ვიდეოჩანაწერი Twitter-ის გვერდზე გაავრცელა.
„ვულოცავ საქართველოს! ამაყები ვართ, რომ ჩვენ გვაქვს საშუალება, მხარი დავუჭიროთ საქართველოს დამოუკიდებლობას და დავაახლოვოთ ეს ქვეყანა ევროკავშირთან, საერთო ღირებულებებზე დაფუძნებული პროცესით”, – წერს ევროკავშირის ელჩი.
„ვაცნობიერებ, რამდენად რთული იყო საქართველოს მოქალაქეებისთვის დამოუკიდებლობისთვის ბრძოლა საბჭოთა მმართველობის დროს, რათა მყარ საფუძველზე აღედგინათ საქართველოს დამოუკიდებელი რესპუბლიკა 1991 წელს. ასევე ამაყი ვარ, რომ ჩვენ მხარს ვუჭერთ საქართველოს დამოუკიდებლობას და იმ ძალისხმევას, რომელიც ქვეყანამ მოდერნიზაციისა და საქართველოს ევროკავშირთან დაახლოებისთვის გასწია, იმ პროცესში, რომელიც საერთო ღირებულებებზეა დაფუძნებული. საქართველოს ყველა მოქალაქემ უნდა იამაყოს მიღწეულით. მათ აქვთ მყარი საფუძველი, შემდეგ საუკუნეს ოპტიმიზმით შეხედონ”, – ამბობს იანოშ ჰერმანი ვიდეოში და აქვე ის საქართველოს მოქალაქეებს დამოუკიდებლობის დღეს ქართულ ენაზე ულოცავს.
