პრეზიდენტ ლეხ კაჩინსკის სწამდა, რომ საქართველოს უსაფრთხოებისა და დამოუკიდებლობის გარეშე არ შედგებოდა დამოუკიდებელი და მშვიდობიანი ევროპა, – ამის შესახებ პოლონეთის პრეზიდენტმა ანდჟეი დუდამ კრინიცას ეკონომიკურ ფორუმზე სიტყვით გამოსვლისას განაცხადა.
მისი თქმით, საქართველო არის პოლონეთის მნიშვნელოვანი პარტნიორი სამხრეთ კავკასიაში.
პრეზიდენტი იმედოვნებს, რომ საქართველოსა და პოლონეთს შორის ეკონომიკური თანამშრომლობა კიდევ უფრო განვითარდება.
“მე ვისმენ გამოსვლებს და მეღიმება, როცა ვიხსენებ ჩემს წინამორბედებს, პოლონეთის პრეზიდენტს ლეხ კაჩინსკის, რომელმაც მხარი დაუჭირა საქართველოს, საქართველოს ერთობას, რაც იყო ევროპული უსაფრთხოების ძალიან მნიშვნელოვანი ელემენტი. პრეზიდენტ ლეხ კაჩინსკის სწამდა, რომ საქართველოს უსაფრთხოებისა და დამოუკიდებლობის გარეშე არ შედგებოდა დამოუკიდებელი და მშვიდობიანი ევროპა და არ იქნებოდა უსაფრთხო სამყარო. როგორც მოგეხსენებათ, პრეზიდენტი კაჩინსკი 2010 წელს რუსეთში დაიღუპა, მაგრამ როცა ვუყურებ ამ ფორუმის დამსწრეებს, ჩვენი ფონდების მიერ მხარდაჭერას და იმ შეხვედრებს, რომელიც დღეს გვექნება, დარწმუნებული ვარ, კაჩინსკი ძალიან დიდი კმაყოფილებით შემოგვხედავდა და მთელი გულით აღნიშნავდა საქართველოს ამ დიდ იუბილეს.
დარწმუნებული ვარ, რომ შემდეგი რამდენიმე წლის განმვლობაში, ჩვენ უფრო მეტის მიღწევას შევძლებთ. ჩვენი ექსპორტი არის საკმაოდ კონკურენტუნარიანი, ჩვენ გვაქვს იგივე მაღალი ხარისხის პროდუქცია, რაც დასავლეთის სხვა ქვეყნებს. ჩვენ დარწმუნებული ვართ, რომ პოლონური უწყებების ჩართულობით ენერგეტიკის სექტორის განვითარება იქნება უფრო მეტად შესაძლებელი საქართველოში. არის ასევე წინადადებები, რომელიც დაკავშირებულია მწვანე ტექნოლოგიებთან ენერგიის განახლებულ წყაროებთან, ენერგიის ეფექტურობასთან, ისევე როგორც ნარჩენების მართვასთან. ასევე, შეგვიძლია ვიმუშაოთ ინფრასტრუქტურის განვითარებაზე, შეგვიძლია მხარი დაგიჭიროთ მრავალფუნქციური სატრანსპორტო კორიდორის განვითარებაში, რომელიც დააკავშირებს აზერბაიჯანს, საქართველოს, უკრაინას და ევროპის სხვა ქვეყნებს, ასევე მონაწილეობა მივიღოთ აბრეშუმის გზის მშენებლობაში. ჩვენ ასევე მოხარული ვართ, რომ პოლონელი ტურისტების რაოდენობა იზრდება საქართველოში“, – განაცხადა ანდჟეი დუდამ.
