მაია ნიკოლეიშვილს პირდაპირ შემიძლია ვუთხრა, რომ მის ამ დასკვნას აბსოლუტურად არ ვეთანხმები - განაცხადა ჟურნალისტებთან ხორავას ქუჩაზე მოკლული მოზარდის, ლევან დადუნაშვულის დედამ, ნათია საყვარელიძემ.
როგორც ის განმარტავს, ექსპერტ მაია ნიკოლეიშვილის მიერ წარმოდგენილი კომპლექსური ექსპერტიზა ვარაუდებზეა დაყრდნობილი.
"ორი მოზარდიდან, ერთ-ერთი დაჩეხილია, ჩემი შვილის, ლევან დადუნაშვილის ჭრილობები თავიდანვე, პირველივე დღიდანვე ჩემთვის ცნობილი იყო - სად, როგორ, რა ორგანოები ჰქონდა დაზიანებული და როგორი განლაგებით. აქედან გამომდინარე, კატეგორიულად არ ვეთანხმები ექსპერტს რა დასკვნაც გააკეთა. მთელი მის მიერ მიცემული ჩვენება იყო ვარაუდის დონეზე. დავით სარალიძეს 12 ჭრილობა აქვს, ჩემსას ორი, ერთი მცირე, ერთი ძირითადი. რომელიც მიჩნეულია გარდაცვალების მიზეზად, ზუსტად იმ ჭრილობაზე ამბობს, ზუსტად ის არ არის დანით მიყენებულიო. ეს რამდენად სარწმუნოა, თქვენ განსაჯეთ. ვერ ვიგებ ლევან დადუნაშვილის ორგანოების განლაგება როგორ დაზიანდაო. ჩემთვის, როგორც სამედიცინო განათლების მქონისთვის, აბსოლუტურად გასაგებია, რატომ დაზიანდა ფილტვი, ღვიძლი და გული. თუ ქალბატონი მაია ამას ვერ იგებს, შემიძლია ექიმთა ოფიციალური დასკვნა მოვუტანო. შემიძლია პირდაპირ ვუთხრა, რომ მის ამ დასკვნას აბსოლუტურად არ ვეთანხმები", - აცხადებს საყვარელიძე.
მისი განმარტებით, ბრალდებულების ადვოკატები განსხვავებულ განმარტებებს აკეთებენ.
"6 თვეა, ყოველი პროცესის შემდეგ ადვოკატების კომენტარებს ვისმენ, როცა ვუსმენ, უმრავლეს შემთხვევაში, მიჩნდება კითხვა, საერთოდ, ერთ პროცესზე ვიჯექით თუ არა, იმდენად განსხვავებული ინფორმაცია გამოდის და განსხვავებულ დასკვნებს აკეთებენ", - დასძენს საყვარელიძე.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის, დავით სარალიძისა და ლევან დადუნაშვულის სიცოცხლე ემსხვერპლა.
