ექსპერტის ჩვენებით კატეგორიულად დგინდება, რომ კონკრეტული, საკმაოდ ბევრი ჭრილობა, რომელიც გარდაცვლილებს მიყენებული აქვთ, გამორიცხულია მიყენებული იყოს ერთი დანითაც და მეორე დანითაც - განაცხადა ჟურნალისტებთან ხორავას ქუჩაზე მომხდარი მკვლელობის საქმეზე ერთ-ერთი ბრალდებულის ადვოკატმა, ტარიელ კაკაბაძემ.
როგორც ის განმარტავს, ექსპერტ მაია ნიკოლეიშვილის ჩვენებით, დგინდება, რომ საქმეში გარდა ორი დანისა, სხვა ბასრი საგნებიც ფიგურირებს.
"საქმეში ორადორი დანა არსებობს, გამორიცხულია ჭრილობები ერთი დანითაც და მეორი დანითაც იყოს მიყენებული. ეს იმას ნიშნავს, რომ უტყუარად დადგინდა, რომ სხვა ნივთები, სხვა ბასრი საგნები, ან თუნდაც, სხვა დანები არის გამოყენებული ამ ორი ადამიანის გარდაცვალების დროს. ეს კი იმას ნიშნავს, რომ სხვა ადამიანებიც მონაწილეობდნენ დავით სარალიძის და მეორე პიროვნების მოკვლის დროს. ბრალდების მხარე გვეუბნება თითქოს, ექსპერტიზა მიკერძოებული ექსპერტის მიერაა შედგენილი, თითქოს, ექსპერტის ჩვენება მიკერძოებულია და არ უნდა დავუჯეროთ. თუ ექსპერტს არ უნდა დავუჯეროთ, თუ სხვადასხვა ექსპერტიზებს არ უნდა ვენდოთ, თუ ბრალდდბულის ჩვენებას არ უნდა დავუჯეროთ, რომელიც უტყუარ მტკიცებულებასთან,ექსპერტიზის დასკვნასთან შესაბამისობაშია, ვის უნდა დავუჯეროთ, მოწმეს რომელმაც ჩვენება 5-ჯერ შეცვალა და თავად ამხელენ დანაშაულის ჩადენაში?
კონკრეტულმა ექსპერტმა ნათლად განმარტა, რომ სასიკვდილო ჭრილობა გამორიცხულია ორივე დანით. ექსპერტმა თქვა, არ შემიძლია ვთქვა, კონკრეტული დანით კონკრეტული ჭრილობაა მიყენებულიო, მაგრმ მე ვამბობ, შესაძლებელია ამ დანითაც იყოს, შესაძლებელია სხვა დანითაც, მაგრამ არსებობს ჭრილობები, რომელიც საერთოდ გამორიცხულია ამ დანებით, ან მსგავსით დანებით იყოს მიყენებულიო", - განაცხადა კაკაბაძემ.
ცნობისთვის, 2017 წლის პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის, დავით სარალიძისა და ლევან დადუნაშვულის სიცოცხლე ემსხვერპლა.