26 მაისს საზოგადოებას პირველად წარედგინება გენერალ გიორგი კვინიტაძის აღდგენილი შესამოსელი, ასევე სამხედრო მოღვაწის ხელნაწერები და ხმოვანი ჩანაწერები.

საგამოფენო ექსპონატებს შორის არის: გენერალ გიორგი კვინიტაძის სამხედრო მუნდირი,  2 ერთეული სამხედრო პერანგი,  ეროვნული ჩოხა და ახალუხი,  ასევე, გენერლის ქალიშვილის - ნანო კვინიტაძის ქართული კაბა; გარდა ამისა, გენერლის მუნდირის გულისჯიბეში აღმოჩენილი წმინდა გიორგის ხატი, „რადიო თავისუფლების“ ქართული სამსახურის არქივიდან გენერალთან ჩაწერილი ინტერვიუ ბაბინებზე, საარქივო დოკუმენტები და ხელნაწერები.

ღონისძიება საქართველოს თავდაცვის სამინისტროსა და კორნელი კეკელიძის სახელობის ხელნაწერთა ეროვნულ ცენტრის ორგანიზებით, ასევე ეროვნულ მუზეუმთან თანამშრომლობით გაიმართება.

ისტორიის ფოტოარქივში შეიარაღებული ძალების მთავარსარდლის, გენერალ გიორგი კვინიტაძის ბევრი ფოტო  მოიძებნება, თუმცა საქართველოს დამოუკიდებელი რესპუბლიკის პერიოდის სამხედრო მოღვაწეთა, მით უმეტეს, გენერლის შესამოსელი შემორჩენილი არ იყო.

უპრეცენდენტო პროექტის იდეა გაჩნდა 2007 წელს, როდესაც გენერლის ქალიშვილმა ნანო კვინიტაძემ მამის არქივი ხელნაწერთა ეროვნულ ცენტრს გადასცა.

2014 წელს გენერალ კვინიტაძის შესამოსელის კოლექციის აღდგენის პროცესში ახალგაზრდა კალიგარფები ჩაერთნენ. მათ უნიკალური ნამუშევრების გამოფენა-გაყიდვით შეძლეს გარკვეული თანხის მობილიზება, რაც კოლექციის მცირე ნაწილის აღდგენას მოხმარდა. კალიგრაფების ღონისძიების შემდეგ, გენერალ კვინიტაძის სრული კოლექციის რესტავრაციის საკითხში თავდაცვის სამინისტრო ჩაერთო და პროცესის ფინანსური უზრუნველყოფა სრულად საკუთარ თავზე აიღო.

გენერალ კვინიტაძის სამოსის კოლექცია სირთულითა და დაზიანების ხარისხის მიხედვით უმძიმეს მდგომარეობაში იყო.  შესამოსელის აღდგენის პროცესი თავდაცვის სამინისტროსა და ხელნაწერთა ეროვნული ცენტრის, ეროვნულ მუზეუმთან თანამშრომლობით განხორციელდა.

სარესტავრაციო სამუშაოები ეროვნული მუზეუმის რესტავრაცია-კონსერვაციის ჯგუფის წევრებმა 6 თვის განმავლობაში ჩაატარეს; ხოლო გენერლის წმინდა გიორგის ხატი, ხელნაწერთა ეროვნული ცენტრის რესტავრატორებმა აღადგინეს.

პროექტის მასშტაბურობიდან გამომდინარე, გენერალ კვინიტაძის აღდგენილი შესამოსელის გამოფენა საქართველოს დამოუკიდებლობის დღისადმი მიძღვნილ საზეიმო ღონისძიებებს შორის გაიმართება.

გამოფენას დაესწრება საქართველოს დამოუკიდებლობის დღისადმი მიძღვნილი ღონისძიებებისათვის საფრანგეთიდან სპეციალურად ჩამობრძანებული, გენერალ კვინიტაძის შვილიშვილი ნოდარ ოდიშელიძე.

გენერალ გიორგი კვინიტაძის აღდგენილი შესამოსელის გამოფენას საქართველოს თავდაცვის მინისტრი ლევან იზორია და ხელნაწერთა ეროვნული ცენტრის დირექტორი ზაზა აბაშიძე გახსნიან.