იქედან გამომდინარე, რომ ჩვენ წარდგენილი გვაქვს ასეულობით მტკიცებულება სტრასბურგის სასამართლოში და ვართ მართლები, სასამართლო თავის სიტყვას იტყვის და პასუხისმგებლობას დააკისრებს იმ ქვეყანას და იმ ადამიანებს, რომლებიც 2008 წლიდან მოყოლებული დღემდე, ჩადიან დანაშაულს ჩვენს ოკუპირებულ ტერიტორიებზე და ამაზე სასამართლოს პასუხი, იმედი მაქვს, იქნება ადეკვატური და სამართლიანი, - ამის შესახებ პარლამენტის ფრაქცია "ქართული ოცნების" თავმჯდომარემ მამუკა მდინარაძემ განაცხადა.
მამუკა მდინარაძემ აღსრულების მექანიზმთან დაკავშირებით განაცხადა, რომ ჯერ ამაზე საუბარი ნაადრევია.
"მოდი ჯერ ნუ ვისაუბრებთ ამაზე. დაველოდოთ სასამართლოს გადაწყვეტილებას. აღსრულების მექანიზმები საკმაოდ რთული იქნება იმიტომ, რომ მეორე მხარეს, რომელსაც შესაძლებელია სანქციები დაეკისროს, არის ოკუპანტი ქვეყანა რუსეთი და იმ ტერიტორიებზე, იმ ქვეყნებთან მიმართებაშიც კი, რომელიც ოკუპაციის ქვეშ არ არის რუსეთის, იქაც ძალიან ჭირს ხოლმე გადაწყვეტილების აღსრულება და იქაც მსგავსი პრობლემებია. ამიტომ ჯერ დაველოდოთ სამართლიან გადაწყვეტილებას, რომელიც აუცილებლად ობიექტურობის ფარგლებში, ჩვენს სასარგებლოდ უნდა გამოვიდეს და შემდეგ ვისაუბროთ სხვა საკითხებზე", - განაცხადა მამუკა მდინარაძემ.
ცნობისთვის, ადამიანის უფლებათა ევროპულ სასამართლოში საქმეზე „საქართველო რუსეთის წინააღმდეგ (II)” დღეს ბოლო ზეპირი მოსმენა გაიმართა.