თემქაზე, 20 წლის ანა ნაცვლიშვილის მკვლელობაში ბრალდებული ლადო გრიგალაშვილის სასამართლო პროცესები თბილისის საქალაქო სასამართლოში მომდევნო კვირიდან გაიმართება.
გრიგალაშვილს სახელმწიფო ბრალდებამ ბრალი სისხლის სამართლის კოდექსის 109-ე მე-3 ნაწილის „ბ“ ქვეპუნქტით დაუმძიმა, რაც განსაკუთრებული სისასტიკით განზრახ მკვლელობის ჩადენას გულისხმობს.
ბრალდების მხარემ უკვე მიიღო ექსპერტიზის შედეგები, რომლის თანახმადაც, მოკლულ გოგონას 33 ჭრილობა აქვს მიყენებული, მათ შორის, თავის არეშიც.
აღნიშნული ექსპერტიზის შედეგები დაცვის მხარისთვის დამაკმაყოფილებელი არ არის. როგორც „ჯი-ეიჩ-ენთან“ გრიგალაშვილის ადვოკატი აცხადებს, მათ ალტერნატიული ექსპერტიზა დანიშნეს.
ბოლო დროის ერთ-ერთ ყველაზე გახმაურებულ საქმეზე სასამართლო სხდომები 22 მაისიდან დაიწყება.
ბრალის დამტკიცების შემთხვევაში, გრიგალაშვილს 16-დან 20 წლამდე, ან უვადო პატიმრობა ემუქრება.
