თემქაზე, 20 წლის ანა ნაცვლიშვილის მკვლელობაში ბრალდებულ ლადო გრიგალაშვილს ბრალი დაუმძიმდა. მას სახელმწიფო ბრალდება მკვლელობის განსაკუთრებული სისასტიკით ჩადენას ედავება.
ექსპერტიზის შედგების თანახმად, რომელიც ბრალდების მხარის მიერ იქნა ჩატარებული, მოკლულ გოგონას 33 ჭრილობა აქვს მიყენებული. ამავე ექსპერტიზის დასკვნით, გოგონას თავის არეშიც აქვს მჭრელი, გალესილი საგნის ჩარტყმის შედგად ჭრილობები მიყენებული.
„ჯი-ეიჩ-ენთან“ ბრალდებულ ლადო გრიგალაშვილის ადვოკატი, ნაირა ოტიაშვილი აცხადებს, რომ მათ ალტერნატიული ექსპერტიზა უკვე დანიშნული აქვთ, რადგან ბრალდების მხარის მიერ დანიშნული ექსპერტიზის შედეგები ბევრ კითხვას პასუხს ვერ სცემს.
„ბრალი დაუმძიმდა, დანიშნული გვაქვს ექსპერტიზა, ვინაიდან ბრალდების მხარის მიერ დანიშნული ექსპერტიზა ძალიან ბევრ საკითხს ვერ არკვევს“, - აცხადებს ოტიაშვილი.
თუ რა კითხვებზე გაეცემა პასუხი დაცვის მხარის მიერ დანიშნული ექსპერტიზით, ადვოკატი ამაზე არ საუბრობს.
„უფლებამოსილება მაქვს, ამ კითხვებზე არ გიპასუხოთ. ექსპერტიზის დასკვნების შემდეგ ვისაუბროთ“, - დასძენს ადვოკატი.
შეგახსენებთ, რომ 20 წლის ანა ნაცვლიშვილის ცხედარი პოლიციამ 22 თებერვალს თბილისში, თემქის დასახლებაში იპოვა. მას თავისა და კისრის არეში ჰქონდა ჭრილობები მიყენებული.
საქმის ძიება სისხლის სამართლის კოდექსის 109-ე მე-3 ნაწილის „ბ“ ქვეპუნქტით მიმდინარეობს, რაც განსაკუთრებული სისასტიკით განზრახ მკვლელობის ჩადენას გულისხმობს.
მომხდართან დაკავშირებით, დაკავებულია 20 წლის ლადო გრიგალაშვილი.
შსს-ს ინფორმაციით, მკვლელობა შურისძიების ნიადაგზე მოხდა. დაკავებული ბრალს არ აღიარებს და დუმილის უფლებას იყენებს. თბილისის საქალაქო სასამართლომ ბრალდებულს აღკვეთის ღონისძიების სახით წინასწარი პატიმრობა შეუფარდა.
ბრალის დამტკიცების შემთხვევაში, გრიგალაშვილს 16-დან 20 წლამდე, ან უვადო პატიმრობა ემუქრება.