ბრალდებულმა პირდაპირ დაადო ორ პიროვნებას ხელი და თქვა, რომ მათ ხელში რაღაც საგნის მაგვარი დაინახა, რომელსაც ჩემს შვილს უქნევდა, - ამის შესახებ ჟურნალისტებს ხორავას ქუჩაზე მოკლული მოზარდის დავით სარალიძის მამამ, ზაზა სარალიძემ ჟურნალისტებს დღევანდელი პროცესის შემდეგ განუცხადა. დღევანდელ სხდომაზე საქმეზე ბრალდებული ერთ-ერთი არასრულწლოვანი დაიკითხა. სარალიძის განმარტებით, ბრალდებულმა სასამართლოს ხორავას ქუჩაზე განვითარებულ მოვლენებზე ჭეშმარიტი ინფორმაცია მიაწოდა.
"პიროვნებების დასახელებისგან ამ ეტაპზე თავს შევიკავებ, თუმცა ბრალდებულმა ორ პიროვნებას დაადო ხელი, რომლებზეც მე აქამდე მქონდა საფუძვლიანი ეჭვი. მან თქვა, რომ ორივე ადამიანის ხელში რაღაც საგნის მაგვარი დაინახა, რომელსაც უქნევდნენ ჩემს შვილს. გარდა ამისა, აღნიშნულმა მოწმემ აღნიშნა ის ფაქტიც, რომ გამოძიება ზეწოლას ახდენდა მასზე. მან ამ დეტალებზე გამოძიებას ჩვენება მისცა, მაგრამ მისი ეს ჩვენება გააქრო პოლიციამ და დევს მხოლოდ ფარული ვიდეოჩანაწერი, სადაც გარკვეულ დეტალებს მალავს, ვინაიდან პოლიციის მხრიდან იყო დაშინებული. ერთ-ერთი ვინც დაასახელა კალანდიაა, ხოლო მეორე არასრულწლოვანია ჯერ კიდევ და თავს შევიკავებ მისი ვინაობის დასახელებისგან", - განაცხადა ზაზა სარალიძემ.
რაც შეეხება დანაშაულში უშუალოდ ბრალდებულის მონაწილეობას, სარალიძე ამბობს, რომ ბრალდებულმა დაადასტურა დანის ქონა, თუმცა მისი გამოყენების თაობაზე გარკვეულ დეტალებზე ბრალდებულს არ უსაუბრია.
ცნობისთვის, 2017 პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.