მოწმის ჩვენებით, დავით სარალიძეს ისეთი პირები აყენებდნენ დაზიანებას, რომლებიც პასუხისგებაში მიცემული არ არიან - განაცხადა ჟურნალისტებთან პროცესის შემდეგ, ხორავას ქუჩაზე მომხდარი მკვლელობის საქმეზე ერთ-ერთი ბრალდებულის ადვოკატმა, ტარიელ კაკაბაძემ.
როგორც ის განმარტავს, სასამართლოში დღეს დაკითხულმა ერთ-ერთმა ბრალდებულმა განაცხადა, რომ ფარდულში დავით სარალიძეს დანას ორი პირი ურტყამდა.
"ბრალდებულმა პირდაპირ განაცხადა, რომ ორი პირი ფარდულში მყოფ დავით სარალიძეს ურტყამდა კონრეტულ ბასრ საგანს. ერთი მათგანი ურტყამდა მარცხენა მხრიდან, მეორე კი მარჯვენა მხრიდან. აქედან გამომდინარე მოწმის ჩვენებით დგინდება, რომ ისეთი პირები აყენებდნენ დაზიანებას დავით სარალიძეს, რომლებიც საერთოდ არ არიან პასუხისგებაში მიცემული. ესენი არიან მოწმეები, რომლებიც ცდილობენ, რომ დანაშაულში ამხილონ სხვა პირები, თუმცა სინამდვილეში სავარაუდო დანაშაული სავარაუდოდ, სწორედ მათ მიერაა ჩადენილი. რა თქმა უნდა, ამ მოწმის ჩვენებით სრულად გამყარდა ჩვენი ვერსია იმასთან დაკავშირებით, რომ კონკრეტულ პირებს მფარველობენ, ისინი შეგნებულად არ მისცეს პასუხისგებაში და არ დასაჯეს იმ დანაშაულისთვის, რაც მათ ჩაიდინეს. ასევე ამ მოწმის ჩვენებით გამყარდა ის ექსპერტიზის დასკვნები, რომელიც არსებობს ამ საქმეში. ჩვენ ასევე ველოდებით ახალი ექსპერტიზის დასკვნებს და მე დარწმუნებული ვარ, ახალი ექსპერტიზის დასკვნაც დაადასტურებს იმას, რომ არა ორი არამედ გაცილებით მეტი დანაა გამოყენებული დავით სარალიძის დაჭრის დროს", - აცხადებს კაკაბაძე.
როგორც ის აღნიშნავს, ბრალდებულის მიერ მიცემული ჩვენება დამაჯერებელია.
"როდესაც ბრალდების მხარე საუბრობს იმაზე, რომ მოწმის ჩვენება არადამაჯერებელია, მაშინ ისმის კითხვა - ვისი ჩვენებაა დამაჯერებელი ბრალდების მხარის ოქროს მოწმის, რომელიც თავად აყენებდა სავარაუდოდ ჭეილობებს გარდაცვლილს, რომელიც დაინტერესებული მოწმეა და რომელმაც დაახლოებით, ხუთჯერ შეცვალა ჩვენება? რა თქმა უნდა, ამ შემთხვევაში მარტვივია განვსაზღვროთ, თუ რომელი მოწმის ჩვენებაა დამაჯერებელი. მე მაინტერესებს, ბრალდების მხარე აპირებს, თუ არა პასუზისგებაში მისცეს ის პირები, რომლებიც დღეს დაკითხულმა პირმა დანაშაულში ამხილა?!", - აცხადებს კაკაბაძე.
ცნობისთვის, 2017 წლის პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
