სასტუმრო „ლეოგრანდის“ საქმეზე დაკავებული გიორგი მიქელაძე და ფათიჰ იაუზი ბათუმის საქალაქო სასამართლოს მოსამართლემ თამარ ბეჟანიშვილმა პატიმრობაში დატოვა. გიორგი მიქელაძე საწყობის გამგე იყო, ხოლო თურქეთის მოქალაქე ფათიჰ იაუზი ტექნიკური მენეჯერი.
დაცვის მხარემ მოსამართლეს 50 ათასის ოდენობის გირაო შესთავაზა, თუმცა მოსამართლემ პროკურატურის არგუმენტები უფრო სარწმუნოდ მიიჩნია, რასაც სხდომათა დარბაზში ხმაური მოჰყვა..
დაკავებულებს გამოძიება სახანძრო უსაფრთხოების წესების დარღვევას ედავება, რამაც ორი ან მეტი ადამიანის სიცოცხლის მოსპობა გამოიწვია. ბრალდება 5-დან 8-წლამდე პატიმრობას ითვალისწინებს.
ცნობისთვის, ბათუმში, სასტუმრო „ლეოგრანდში“ ხანძარი 24 ნოემბერს, დაახლოებით, 22:00 საათზე გაჩნდა.
ხანძრის შედეგად 11 ადამიანი დაიღუპა, მათგან საქართველოს 10 და ირანის ერთი მოქალაქე. დაშავდა 21 ადამიანი, მათგან ერთი ისრაელის მოქალაქეა, 5 კი - თურქეთის.
შინაგან საქმეთა სამინისტროს აჭარის პოლიციის დეპარტამენტის თანამშრომლებმა, ოთხთვიანი გამოძიების შედეგად, სასამართლოს განჩინების საფუძველზე, სასტუმრო „ლეოგრანდში“ სახანძრო უსაფრთხოების წესების დარღვევის ფაქტზე, ბათუმში, აღნიშნულ სასტუმროში მენეჯერულ პოზიციაზე მომუშავე 2 პირი: თურქეთის რესპუბლიკის მოქალაქე, 1979 წელს დაბადებული ფ.ი. და საქართველოს მოქალაქე, 1978 წელს დაბადებული გ.მ. დააკავეს.
მათ მიერ ჩადენილი დანაშაული 5-დან 8-წლამდე ვადით თავისუფლების აღკვეთას ითვალისწინებს.