თურქეთში ისრაელის ელჩმა, ეითან ნაეჰმა ქვეყანა დატოვა - თურქეთის ხელისუფლების ბრძანებების თანახმად, ღაზას სექტორში არსებული ვითარების გამო. იუწყება თურქული სააგენტო
მისივე ცნობით, ელჩი, რომელსაც თან ახლდნენ მცველები და საკონსულოს თანამშრომლები, ჩარტერული რეისით გაფრინდა ავიაკომაპნია Turkish Airlines-ით, სტამბოლიდან თელ-ავივის მიმართულებით.
მანამდე თურქეთის ხელისუფლებამ ისრაელის ელჩის დროებით გაძევების შესახებ გააკეთა განცხადება. თურქეთის საგარეო საქმეთა სამინისტრომ ასევე მიმართა სტამბოლში ისრაელის გენერალურ საკონსულოს წინადადებით, გარკვეული პერიოდით დაეტოვებინათ ქვეყანა. გარდა ამისა, ანკარამ კონსულტაციებისთვის გამოიწვია თავისი ელჩი თელ-ავივიდან.
ცნობისთვის, ღაზას სექტორში საპროტესტო აქციები ორშაბათს გაიმართა, რომელიც უკავშირდებოდა აშშ-ს საელჩოს თელ-ავივიდან იერუსალიმში გადატანის ცერემონიალს.