ევროსაბჭოში „პანელური დისკუსია გენდერული თანასწორობის შესახებ" გაიმართა.
დისკუსიაში მონაწილეობა მიიღეს პარლამენტის თავმჯდომარის პირველმა მოადგილემ, საქართველოს პარლამენტის მუდმივმოქმედი დელეგაციის ხელმძღვანელმა თამარ ჩუგოშვილმა, დანიის დელეგაციის ხელმძღვანელმა მაიკლ იენსენმა, შვედეთის დელეგაციის წევრმა, იონას გუნარსონმა და ასამბლეის თანასწორობის კომიტეტის თავმჯდომარემ, სერბმა დეპუტატმა ელვირა კოვაჩიმ.
"ევროსაბჭოს საპარლამენტო ასამბლეაში გვქონდა ღონისძიება სხვადასხვა ქვეყნებთან ერთად ქალთა პოლიტიკურ მონაწილეობასთან დაკავშირებით. სამწუხაროდ, საქართველო ერთ-ერთი ის ქვეყანაა, სადაც ქალთა პოლიტიკური მონაწილეობა ყველაზე დაბალია, ამავე დროს აქ არიან ქვეყნები, რომელთაც მსოფლიოში საუკეთესო მაჩვენებელი აქვთ ამ მიმართულებით. ქვეყნის რეპუტაციისთვის ძალიან მნიშვნელოვანია, რომ ქალებსაც და კაცებსაც ჰქონდეთ თანასწორი შესაძლებლობები, რომ გადაწყვეტილების მიღების პროცესში თანაბრად იყვნენ ჩართულები. მე იმედი მაქვს, რომ საქართველოს პარლამენტი ხელს შეუწყობს ჩვენი ქვეყნის რეპუტაციის ამ კუთხით გაუმჯობესებას, იმიტომ, რომ ჩვენ ეს ძალიან გვჭირდება."
ღონისძიება ჟურნალ "პარლამენტის" ორგანიზებით ჩატარდა,სადაც ასევე, გაიმართა ახალი ნომრის პრეზენტაცია.