დარწმუნებული ვარ, პოლიტსაბჭო და დელეგატები ერთხმად აირჩევენ ბიძინა ივანიშვილს ახალ თავმჯდომარედ,– ამის შესახებ საქართველოს პრემიერ-მინისტრმა გიორგი კვირიკაშვილმა “ქართული ოცნების” ოფისში გამართული შეხვედრის შემდეგ განაცხადა, რომელსაც ბიძინა ივანიშვილიც ესწრებოდა.
მისივე თქმით, უახლოეს დღეებში გაიმართება პარტიის პოლიტსაბჭოს სხდომა და შემდეგ უკვე ყრილობა.
“დარწმუნებული ვართ, რომ როგორც პოლიტსაბჭო და დელეგატები ერთხმად აირჩევენ ბიძინა ივანიშვილს ახალ თავმჯდომარედ და შესაბამისად არჩეული იქნება პოლიტიკური საბჭოს განახლებული შემადგენლობა. დარწმუნებული ვარ, ეს გადაწყვეტილება პოზიტიურად აისახება ჩვენი ქვეყნის პოლიტიკურ ცხოვრებაზე. ეს იქნება ახალი იმპულსი ჩვენთვის პარტია „ქართული ოცნების“ თითოეული წევრისთვის, ჩვენი გუნდისთვის და პირადად ჩემთვის, როგორც პრემიერ-მინისტრისთვის”, – განაცხადა გიორგი კვირიკაშვილმა.
გიორგი კვირიკაშვილმა დღეს, 26 აპრილს, „ქართული ოცნების“ ოფისში, პარტიის ხელმძღვანელობისა და საპარლამენტო უმრავლესობიდან პარლამენტის ბიუროს წევრების შეხვედრის დასრულების შემდეგ განაცხადა, მან ბიძინა ივანიშვილს შესთავაზა პარტიის თავმჯდომარეობა, რაზეც თანხმობა მიიღო. ბიძინა ივანიშვილი სამომავლოდ პარტია „ქართულ ოცნებას“ უხელმძღვანელებს, რომელსაც ამ დრომდე მოქმედი პრემიერ-მინისტრი გიორგი კვირიკაშვილი ხელმძღვანელობდა.
გიორგი კვირიკაშვილი პარტიის თავმჯდომარედ 2016 წლის 14 მაისს, „ქართული ოცნება-დემოკრატიული საქართველოს“ ყრილობაზე აირჩიეს.