როდესაც ვლაპარაკობთ, რომ ძალადობასა და ძალადობის წახალისებას იწვევს სიძულვილის ენაო, როგორც ამბობს დიმიტრი ლორთქიფანიძე, არავინ დაუსჯიათ ამ ქვეყანაში 2013 წლის 17 მაისს, როდესაც ადამიანები ძალადობდნენ სხვა ადამიანებზე ფიზიკურად, ამიტომ ეს არის ყველაფერი სინამდვილეში შეფუთვა და ნიშანდობლივია, რომ საქართველოში ამ კანონის მიღებას მხარს უჭერენ არა უმცირესობები, არამედ ამ კანონის მხარდამჭერები არიან დომინანტი ჯგუფები, რომლებსაც სურთ, რომ საკუთარი კრიტიკა შეზღუდონ საზოგადოებაში, - ამის შესახებ "საქართველოს დემოკრატიული ინიციატივის" (GDI) თავმჯდომარე გიორგი მშვენიერაძემ ტელეკომპანია "პირველის" ეთერში, რელიგიური გრძნობების შეურაცხყოფის კრიმინალიზების კანონპროექტთან დაკავშირებით განაცხადა.
მისი თქმით, როდესაც მსგავსი საკითხის განხილვა ხდება, საზოგადოებას მოლოდინი აქვს, რომ პარლამენტის წევრები ისაუბრებენ კონსტიტუციის და არა რელიგიის სახელით.
„საქართველოს მოქალაქეებს, რომლებსაც გვინდა გვქონდეს სამართლებრივი და გვაქვს სეკულარული სახელმწიფო, როდესაც მსგავსი საკითხების განხილვა ხდება საქართველოს პარლამენტში, მოლოდინი აქვთ, რომ ადამიანის უფლებათა კომიტეტის თავმჯდომარე და ზოგადად, სხვა პარლამენტის წევრები ისაუბრებენ არა რომელიმე რელიგიის სახელით, არამედ ისაუბრებენ საქართველოს კონსტიტუციისა და კონსტიტუციური სტანდარტების სახელით", - განაცხადა გიორგი მშვენიერაძემ.
ჟურნალისტის შეკითხვაზე, არის თუ არა ეს სპეკულაციური მიდგომა ამომრჩევლის გულის მოსაგებად, მშვენიერაძემ აღნიშნა, რომ მისთვის გაუგებარია, რატომ აკეთებს ამას ადამიანის უფლებათა დაცვის კომიტეტის თავმჯდომარე სოფო კილაძე.
"არ ვიცი, რატომ აკეთებს ასე ადამიანის უფლებათა დაცვის კომიტეტი თავმჯდომარე თუ სხვა დეპუტატები, მაგრამ სამწუხაროა, რომ მათთვის მთავარი სახელმძღვანელო დოკუმენტი არა კონსტიტუცია და კონსტიტუციურად აღიარებული, საზოგადოების მიერ შეთანხმებული და განმტკიცებული ადამიანის უფლებები და თავისუფლებებია, არამედ მათი პირადი რელიგიური წარმოდგენები", - აღნიშნა მშვენიერაძემ.
როგორც GDI-ის დამფუძნებელი ამბობს, დღემდე არავინ დაუსჯიათ ქობულეთში მომხდარ შემთხვევაზე, როდესაც მუსლიმებს მედრესეზე ღორის თავი მიუჭედეს.
"რა თქმა უნდა, ბატონი დიმიტრი [ლორთქიფანიძე] საუბრობდა რომ „სვასტიკა“ არ უნდა მიახატონ სინაგოგაზე, მე არ მახსოვს მისი პროტესტი, როდესაც მუსლიმებს მედრესეზე ქობულეთში ღორის თავი მიუჭედეს. ეს უკვე ცალსახად დანაშაულია, სსკ-ს მოქმედი კოდექსით დასჯადი, მაგრამ ამაზე არავინ დაუსჯიათ. როდესაც ვლაპარაკობთ, რომ ძალადობასა და ძალადობის წახალისებას იწვევს სიძულვილის ენაო, როგორც ამბობს ლორთქიფანიძე, არავინ დაუსჯიათ ამ ქვეყანაში 2013 წლის 17 მაისს, როდესაც ადამიანები ძალადობდნენ სხვა ადამიანებზე ფიზიკურად, ამიტომ ეს არის ყველაფერი სინამდვილეში შეფუთვა და ნიშანდობლივია, რომ საქართველოში ამ კანონის მიღებას მხარს უჭერენ არა უმცირესობები, არამედ ამ კანონის მხარდამჭერები არიან დომინანტი ჯგუფები, რომლებსაც სურთ რომ საკუთარი კრიტიკა შეზღუდონ საზოგადოებაში, როგორც ხშირად ამბობენ - უშიშარ ადამიანებს არ ეშინიათ თავისუფალი სიტყვის, არ ეშინიათ თავისუფალი აზრის, რადგან ამ აზრს უპირისპირდებიან სიტყვით და ეს შობს დემოკრატიულ პროცესს, ხოლო ადამიანებს, რომლებსაც არ აქვთ საკმარისი არგუმენტები სისწორის დასამტკიცებლად, მათ სურთ დუმილის დაწესება, სწორედ ამასთან გვაქვს საქმე", - განაცხადა გიორგი მშვენიერაძემ, რომელმაც აქვე დასძინა, რომ სწორედ მსგავსი ნორმით, ღვთის გმობის ბრალდებით გაასამართლეს ქრისტე.
ცნობისთვის, პარლამენტის ადამიანის უფლებათა დაცვის კომიტეტის წევრებმა იდეის დონეზე მხარი დაუჭირეს პროექტს, რომლითაც რელიგიური გრძნობების შეურაცხყოფა სისხლის სამართლის წესით დასჯადი ქმედება ხდება.
კომიტეტის წევრებმა "პატრიოტთა ალიანსის" წევრის ემზარ კვიციანის საკანონმდებლო ინიციატივას იდეის დონეზე იმ პირობით დაუჭირეს მხარი, რომ პროექტი სამუშაო ჯგუფის ფარგლებში გადამუშავდება.
როგორც ინიციატივის განხილვაზე პარლამენტის ადამიანის უფლებების დაცვის კომიტეტის თავმჯდომარე სოფიო კილაძემ განაცხადა, ის მხარს უჭერს, რომ რაღაც ფორმით მოხდეს დარეგულირება, რათა ადამიანებმა ერთმანეთს შეურაცხყოფა არ მიაყენონ და ეს იყოს კანონმდებლობით გათვალისწინებული.