ერევანში საპროტესტო აქციებმა ქალაქის მთელი ცენტრი მოიცვა. აქციები ასევე მიმდინარეობს სომხეთის სიდიდით მეორე ქალაქ გიუმრში და რამდენიმე სხვა დასახლებულ პუნქტში.
უამრავი ადამიანი შეიკრიბა ქალაქის ცენტრში, რესპუბლიკის მოედანზე, სადაც მთავრობის შენობა მდებარეობს. ოპოზიციონერები აფრიალებენ დროშებს და უკრავენ საყვირებს. თავად მთავრობის შენობას პოლიციის კორდონი იცავს, თუმცა შეტაკება მათ შორის არ ხდება. მთავრობის შენობის შესასვლელში შეიარაღებული ჯარისკაცები დგანან.
მმართველი რესპუბლიკური პარტიის ოფისში პოლიციის დიდი ძალებია მობილიზებული, ასევე ორი ჯავშანტრანსპორტიორი და ბევრი ავტობუსი. ოფისში შესასვლელი გადაკეტილია. ოპოზიციონერები პოლიციასთან საუბრობენ.
ამავე დროს, ერევნის ყველა ცენტრალურ ქუჩაზე მომიტინგეები მარშირებენ. ავტომანქანების გადაადგილება შეზღუდულია, თუმცა ისინი მხარს უჭერენ დემონსტრანტებს და მათ საყვირით ამხნევებენ.