2021 წლის ბოლომდე ბათუმის იახტკლუბი ექსპლუატაციაში შევა. პროექტს კომპანია „რივიერა“ განახორციელებს, რომელსაც ტერიტორია 20 წლიანი იჯარით გადაეცა. პროექტის განხორციელებისათვის კომპანიამ მინიმუმ 3 მლნ დოლარის ინვესტიცია უნდა განახორციელოს.

ხელშეკრულების მიხედვით, სრული საიჯარო ქირა სრულ სახელშეკრულებო პერიოდზე შეადგენს 1 ლარს.  

ხელშეკრულების მიხედვითვე, „რივიერაზე“ გაიცემა ადმინისტრაციული დაპირება, თუ კი საიჯარო ხელშეკრულების გასვლის შემდეგ, სხვა კომპანიის მხრიდან არ იქნება ალტერნატიული უკეთესი წინადადება წარდგენილი, მაშინ „რივიერას“ შესაძლებლობა ეძლევა ხელშეკრულების გაგრძელება მოითხოვოს.

მოიჯარე ვალდებულია 9 თვეში უზრუნველყოს იახტკლუბის განვითარების პროექტის (ნავსაყუდელი, იახტკლუბი რესტორნით, პლაჟი, მშრალი დოკი, სახელოსნო, მცურავი საშუალებების (ნავი, იახტა და ასე შემდეგ) ტიპი, კლასი და რაოდენობა) შემუშავება.

12 თვეში "რივიერამ" უზრუნველყოს შეთანხმებული პროექტის სარემონტო სამუშაოების განხორციელება, მშენებლობა და 2021 წლის 31 დეკემბრამდე მისი ამოქმედება.

ხელშეკრულების თანახმად „რივიერამ“ 2019 წლის ბოლომდე მინიმუმ 0,5 მლნ დოლარის ინვესტიცია უნდა განახორციელოს. ასევე პროექტის განვითარებაში 2020 წლის ბოლომდე დამატებით 1.5 მლნ დოლარის, ხოლო 2021 წლის ბოლომდე 1 მლნ დოლარის ინვესტიცია ჩაიდოს.

ხელშეკრულების გასვლის შემდეგ, მოიჯარეს უფლება აქვს თავის საკუთრებაში დაიტოვოს ქონების ის ნაწილი, რომლითაც მან იჯარით აღებული ქონება აღჭურვა, თუ შესაძლებელია მისი გამოცალკავება. ხოლო თუ აღნიშნული ქონების გამოცალკავება შეუძლებელია მთლიანი ქონება, მათი დანიშნულების მოსპობის გარეშე ასეთ შემთხვევაში ქონება რჩება „მეიჯარის“ საკუთრებაში ყოველგვარი ანაზღაურების გარეშე.

აღსანიშნავია, რომ შპს „რივიერას“ 100% -იანი წილი ეკუთვნის ნიდირლანდებში რეგისტრირებულ „ესარჯი რიალ ისთეითს“, რომელიც საქართველოში სულ 8 კომპანიის მეწილეა. მათ შორისა წინანდლის ვილები, ეფ ტელეკომი, მედეა ოფერეითინგ კომპანი, რივიერა, სილქ როუდ ბიზნეს ცენტრი, ესარჯი რიალ ისთეით, ლიმონი რიალ ისთეითი და აჭარა ინვესტმენტსი.