საქართველოში, ამ დროისთვის, რუსეთიდან იმპორტირებული ხორბლის გაძვირება მოსალოდნელი არ არის. როგორც საქართველოს ხორბლისა და ფქვილის ასოციაციის ხელმძღვანელი ლევან სილაგავა „ჯი-ეიჩ-ენთან“ საუბარში აცხადებს, საქართველოს საკმაოდ კარგი გარდამავალი მარაგები გააჩნია და ამ დროისათვის ქვეყანაში ხორბლის ფასისა და, შესაბამისად, ფქვილის კრიტიკული გაძვირება, მოსალოდნელი არ არის.
„ქვეყანას გააჩნია სათანადო მარაგები იმისათვის, რომ რუსული ხორბლის გაძვირების ფონზე, ორი თვის განმავლობაში ადგილობრივ ბაზარზე სტაბილური ფასები შეინარჩუნოს. ამავდროულად, ივნისის შუა რიცხვებში რუსეთსა და საქართველოში ხორბლის ახალი მოსავალიც იქნება, რაც ფასების დასტაბილურებას შეუწყობს ხელს”,- განაცხადა „ჯი-ეიჩ-ენთან“ საუბრისას ლევან სილაგავამ.
მისი თქმით, ერთადერთ რისკფაქტორად, რომელიც, შესაძლოა, ფასებზე აისახოს, კურსის კრიტიკული ცვლილებაა.
როგორც ცნობილია, საქართველოში იმპორტირებული ხორბლის უდიდესი წილი რუსულ ხორბალზე მოდის. რუსული მედიის ცნობით, მარტის შუა რიცხვებიდან ხორბალზე ფასის მატება დაიწყო და დღემდე გრძელდება.
რაც შეეხება საექსპორტო ბაზარს, რუსული ხორბლის ფასმა უკვე 3 დოლარით მოიმატა და ტონაზე 213 დოლარი შეადგინა, რაც თავის მხრივ, 2014/15 წლების სეზონის შემდეგ, ყველაზე მაღალი მაჩვენებელია.