ევროკავშირი ხელს არ შეუწყობს სირიის აღდგენას, ქვეყანაში პოლიტიკური პროცესების დაწყებამდე.
ამის შესახებ ევროკავშირის უმაღლესმა წარმომადგენელმა, საგარეო პოლიტიკისა და უსაფრთხოების საკითხებში, ფედერიკა მოგერინიმ გაეროს და ევროკავშირის მიერ ორგანიზებულ საერთაშორისო კონფერენციაზე განაცხადა.
"ევროკავშირი ხელს არ შეუწყობს სირიის აღდგენას ქვეყანაში პოლიტიკური პროცესების დაწყებამდე, მაგრამ ჩვენ ხელს შევუწყობთ ერთიან, მშვიდობიან სირიას, რომელიც მიდის პოლიტიკური დარეგულირების გზით“ - განაცხადა მან.
მოგერინმა დასძინა, რომ ევროკავშირმა უკვე გამოყო 11 მილიარდი ევრო სირიის მოსახლეობის დასახმარებლად და ასევე ლტოლვილებისთვის.
"ევროკავშირმა უკვე გამოყო 11 მილიარდ ევროზე მეტი სირიის დასახმარებლად, როგორც ქვეყნისთვის ასევე მის ფარგლებს გარეთ. დღეს ჰუმანიტარული მხარდაჭერა აუცილებლობაა და არა ერთ-ერთი შესაძლებლობა“ - განაცხადა მან.
