დღეს, მოგეხსენებათ, მედიასაშუალებებში პოზიტივი არის არამოდური, სამწუხაროდ ყოველთვის ნეგატივზე კეთდება აქცენტი. თუმცა, როდესაც თვალს გადავავლებთ რა გაკეთდა, ნამდვილად შემიძლია ვთქვა, რომ ყველა ჩვენგანს აქვს საამაყო გაკეთებული საქმეების გამო, – ამის შესახებ ქუთაისში, პარტიის რეგიონულ კონფერენციაზე, „ქართული ოცნება-დემოკრატიული საქართველოს“ თავმჯდომარე გიორგი კვირიკაშვილმა განაცხადა.
კვირიკაშვილის თქმით, საქართველო შეუქცევადად მიიწევს წინ და ახალ წარმატებებს აღწევს.
მისივე განცხადებით, არის მიღწევები და ჩავარდნები, მაგრამ ქვეყანა თანმიმდევრულად მიდის წინ.
„განსაკუთრებული აღნიშვნის ღირსია საგარეო პოლიტიკაში მიღწეული წარმატებები – ასოცირების ხელშეკრულება, ევროპასთან თავისუფალი ვაჭრობა და საბოლოოდ, ევროპასთან უვიზო მიმოსვლა, რაც, უვიზო მიმოსვლის გარდა არის მნიშვნელოვანი ნდობა ცივილიზებული სამყაროს მხრიდან ჩვენი ქვეყნისადმი, ჩვენი ხელისუფლების მიერ განხორციელებული რეფორმებისადმი“, – განაცხადა გიორგი კვირიკაშვილმა.