"ექსპერტიზის მიერ დადებულ დასკვნაში წერია, რომ ვერ დადგინდა, ჩემი შვილისთვის მომაკვდინებელი ჭრილობა რომელი დანით და რა იარაღით იყო მიყენებული", - განაცხადა ჟურნალისტებთან, ხორავას ქუჩაზე მოკლული დავით სარალიძის მამამ, ზაზა სარალიძემ.
დღეს ბრალდების მხარემ სასამართლოში კომპლექსური ექსპერტიზის დასკვნა წარადგინა, რომლითაც, როგორც სარალიძე განმარტავს, ვერ დადგინდა, თუ რომელი დანით და ვის მიერ მოხდა ჭრილობების მიყენება.
"დასკვნაში ნათლად ჩანს, რომ ის მომაკვდინებელი, არტერიული ჭრილობა ამ ორი დანით არაა მიყენებული. შესაბამისად, ვისგან იყო მიყენებული ჭრილობა, ამის დადგენაც შეუძლებელია. თუ არ არსებობს იარაღი, რა იარაღით მიაყენეს ჭრილობა, შესაბამისად დამნაშავეც გამოვლენილი არ არის", - აცხადებს სარალიძე.
ის დაკავებული ორი მოზარდის ბრალეულობაში დარწმუნებულია.
"ეს ორი ბრალდებული, რომელიც ბრალდებულის სკამზე ზის, ნამდვილად დამნაშავეა, ნამდვილად მიესჯებათ საკადრისი სასჯელი, მაგრამ მე უკვე ეჭვი მიჩნდება, რომ კიდევ შესაძლებელია სხვა იარაღიც იყო გამოყენებული. დანები აქვთ, ჩემი შვილის სხეული ჰქონდათ, ტანსაცმელიც აქვთ და ვერ დაადგინეს ამ ორი დანიდან რომელიმე გამოყენებული იყო თუ არა. ეს ხომ აბსურდია?! მაშინ რაღა ექსპერტია? ჩემი აზრით,სხვა იარაღიც გამოიკვეთა, მაგრამ გამოძიებამ აბსოლუტურად ყველაფერი შეცვალა და ეს ექსპერტიზის დასკვნა მოარგო მოწმეების ჩვენებებს. ჩემი შვილის მომაკვდინებელ ჭრილობაზე არცერთი დანა არ არის მითითებული. არც ეს ორი დანაა მითითებული და არც სხვა იარაღია მითითებული. მომავალ სხდომაზე დაიკითხებიან ექსპერტები, რომლებმაც ეს შედეგები გამოიკვლიეს და ვნახოთ,რა კითხვებს გასცემენ პასუხს", - აცხადებს სარალიძე.
