"ნუ მომკლავ - აღასრულე სამართალი" - ამ ლოზუნგით თბილისის საქალაქო სასამართლოს ეზოში აქცია მიმდინარეობს.
როგორც "ჯი-ეიჩ-ენის" ჟურნალისტი ადგილიდან იუწყება, 51-ე სკოლის მოსწავლეები, მოკლულ დავით სარალიძის ოჯახის წევრები და მეგობრები ითხოვენ, გამოძიება ობიექტურად ჩატარდეს და ყველა დამნაშავე დაისაჯოს.
"მთელი საქართველო მინდა გაერთიანდეს და უსამართლობის წინააღმდეგ იბძოლონ", - ამ სიტყვენით მიმართა ზაზა სარალიძემ საზოგადოებას.
ცნობისთვის, ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა.
პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგანმხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.