თურქეთი საქართველოს მარნეულის აეროდრომის მოდერნიზებასა და თავდაცვის მიზნებისთვის საჭირო საქონლის მიწოდებაში დაეხმარება.
ამ მიზნით, თურქეთის მთავრობამ საქართველოს დამატებით 5.5 მლნ თურქული ლირა გამოუყო. ამავე მიზნებისთვის დაიხარჯება წინა წლებში გამოყოფილი, თუმცა დაუხარჯავი 3.88 მლნ დოლარიც.
უკვე ცნობილია, რომ 5.5 მილიონიდან 1 მლნ დაიხარჯება მარნეულის აეროდრომის მოდერნიზებისთვის, დანარჩენი 4.5 მლნ თურქული ლირა, ასევე 3.88 მლნ დოლარი კი, სამხედრო საინჟინრო სკოლას უნდა მოხმარდეს, თუმცა გარკვეული პირობით.
ხელშეკრულებაში ჩადებულია, რომ საქართველო საქონლის შეძენას მხოლოდ თურქეთში მოქმედი კომპანიებიდან შეეძლება.
პროცედურის მიხედვით, საქართველო თურქეთის თავდაცვის სამინისტროს გაუგზავნის მოთხოვნათა ნუსხას, იქვე განისაზღვრება კომპანიებიც და მხოლოდ ამის შემდეგ დაიწყება შესყიდვა.
თუ შესყიდვა აღემატება გამოყოფილ რესურსს, თანხას საქართველოს მთავრობა დაამატებს. თუ თანხა მორჩება, ის ხელმისაწვდომი იქნება ნაღდი ფულის სახით.
საქართველოსა და თურქეთის მთავრობებს შორის სამხედრო თანამშრომლობის შეთანხმებას პარლამენტის თანხმობა სჭირდება.
შეგახსენებთ, მარნეულის აეროდრომი რუსეთ-საქართველოს ომის დროს რამდენჯერმე დაიბომბა