"მყისიერად მოხდა რეაგირება, როდესაც მიხეილ კალანდიამ აღნიშნული ინფორმაცია 11 აპრილს, სასამართლო სხდომაზე დაკითხვისას განაცხადა. იმავე დღეს მივმართე მოხსენებითი ბარათით შესაბამის კომპეტენტურ პირს და მთავარ პტოკურატურაში დაიწყო გამოძიება", - აცხადებს ხორავას ქუჩაზე მომხდარი მკვლელობის საქმის პროკურორი, ზვიად ფხაკაძე.
საუბარია, მიხეილ კალანდიას მიერ გაჟღერებულ ინფორმაციაზე, რომლის მიხედვითაც, წინა საგამოძიებო ეტაპზე მასსა და მამამისზე, თენგიზ კალანდიაზე ფსიქოლოგიური და ფიზიკური ზეწოლა განხორციელდა. დღევანდელ სხდომაზე ბრალდების მხარის 5 მოწმე დაიკითხება.
"ბრალდების მხარის მიერ დღევანდელ პროცესზე წარმოდგენილი იქნება 5 მოწმე და შევეცდებით, რომ ხსენებული მოწმეების დაკითხვა დღევანდელ სხდომაზე მორჩეს. რაც შეეხება მოწმეთა ვინაობას, ნაწილი მათგანი არიან ექსპერტები, მათ შორის სამედიცინო ექსპერტი, რომლებიც ისაუბრებენ გარდაცვლილზე არსებული დაზიანებების თაობაზე, რა რაოდენობის დაზიანებები იყო, რა მიმართულებების ჭრილობები იყო და ა.შ. ასევე ერთ-ერთი მოწმეა პირი, რომელიც შემთხვევის ადგილზე იმყოფებოდა და რა მოცულობითაც ნახა ის ვითარება, რაც 2017 წლის 1 დეკემბერს იყო ხორავას ქუჩაზე, ამის თაობაზე ისაუბრებს სასამართლოზე", - აცხადებს ფხაკაძე.
ცნობისთვის, ხორავას ქუჩაზე,პირველ დეკემბერს მოზარდებს შორის სისხლიან გარჩევას, ორი არასრულწლოვანის სიცოცხლე ემსხვერპლა.